काठमाडौं । बाँसबारी माविले काठमाडौं महानगरपालिका–४ द्वारा आयोजित चेयरम्यान कप स्कुल चेस च्याम्पियनसिपको उपाधि जितेको छ । बालुवाटारमा बिहीबार सम्पन्न प्रतियोगितामा सर्वाधिक ७६ अंक जोड्दै बाँसबारी च्याम्पियन बनेको हो ।

हिमालयन चेस एकेडेमीको व्यवस्थापनमा सञ्चालित दुईदिने र्‍यापिड चेसका ६ स्पर्धामा २० विद्यालयका ३१९ खेलाडीले प्रतिस्पर्धा गरेका थिए । प्रत्येक स्पर्धामा शीर्ष १० खेलाडीलाई दिइएको अंकको आधारमा बाँसबारी चेयरम्यान कप चेस च्याम्पियन भएको हो । नेसनल क्रियटीभ को–एडुकेसनल स्कुल (एनसीसीएस) ५३ अंकसहित उपविजेता बन्यो । महेन्द्र राष्ट्रिय मावि ३२ अंक जोड्दै तेस्रोमा रह्यो ।

व्यक्तिगत स्पर्धामा बाँसबारीकी सिमरन कार्की सबैभन्दा बढी चार अंक बटुल्दै कक्षा १ देखि ४ छात्रामा प्रथम भइन् । बाँसबारीकै सुप्रिया मोक्तान, धुम्रवराही माविकी सन्ध्याकुमारी शाह र महेन्द्र राष्ट्रियकी आशिका लोप्चनले समान ३–३ अंक जोडे पनि टाइब्रेकरको आधारमा सुप्रिया दोस्रो र सन्ध्या तेस्रो भए ।

छात्रतर्फ मेरिडियन इन्टरनेसनल स्कुलका आयम सुवेदी पाँच खेल जित्दै पहिलो भए । एनसीसीएसका अर्णव मानन्धरले समान चार अंक जोडेका आफ्नै स्कुलका श्रेयांश सापकोटालाई टाइब्रेकरमा उछिन्दै दोस्रो स्थान हात पारे ।

कक्षा ५ देखि ८ छात्रामा एनसीसीएसकी आराध्य गुप्ता पाँच अंक जोड्दै पहिलो भइन् । धुम्रवाराहीकी समीक्षा नेपाल (४.५ अंक) दोस्रो र बाँसबारीकी अप्सरा खत्री (चार) तेस्रोमा रहे । ब्वाइजतर्फ पञ्चकन्या आधारभूत विद्यालयका अतिश महर्जन ६.५ अंकसहित प्रथम भए । समान ६ अंक जोडेका बाँसबारीका शिशिर ढकाल दोस्रो र सुमिर तामाङ तेस्रो स्थानमा रहे ।

त्यस्तै, कक्षा ९ देखि १२ छात्रामा वाग्मती बोर्डिङकी देवयानी गुरागाइँले पाँच अंक बनाउँदै शीर्षस्थान कब्जा गरिन् । वाग्मतीकै मायुमी राई चार अंकसहित दोस्रो भइन् । उति नै अंक जोडे पनि टाइब्रेकरमा पछाडि परेपछि एनसीसीएसकी आँचल चौधरी तेस्रोमा सीमित हुनुपर्‍यो । 

छात्रतर्फ न्युटन हाइस्कुलका सोहन प्रजापतिले ६.५ अंक जोड्दै पहिलो स्थान हासिल गरे । बृहस्पति  विद्यासदनका प्रेम विक्रम अधिकारीले समान ६ अंक बनाएका वाग्मतीका आयुष बस्नेतलाई टाइब्रेकरमा पन्छाउँदै दोस्रो स्थान हात पारे ।

बालुवाटारस्थित महेन्द्र राष्ट्रिय माविको हलमा आयोजित प्रतियोगिताका च्याम्पियन तथा विभिन्न ६ स्पर्धाका विजेताहरूलाई काठमाडौं महानगरपालिका–४ का वडाध्यक्ष दिनेश महर्जन, चेसकी पहिलो महिला राष्ट्रिय च्याम्पियन मोनालिशा खम्बूलगायतले ट्रफी, मेडल तथा प्रमाणपत्र प्रदान गरे ।