कैलाली । वाग्मती प्रदेश र त्रिभुवन आर्मी क्लब धनगढीमा जारी प्रधानमन्त्री कप टी–२० महिला राष्ट्रिय क्रिकेट प्रतियोगिताको सुपर फोरमा प्रवेश गरेका छन् ।

आज सम्पन्न दोस्रो खेलमा मधेस प्रदेशलाई ७ विकेटले हराएर समूह बी को उपविजेताको रूपमा वाग्मती सुपर ४ मा पुगेको हो । जितका लागि पाएको ४१ रनको लक्ष्य वाग्मतीले ६ दशमलव ४ ओभरमा ३ विकेटको क्षतिमा पूरा गर्‍यो । जसमा यसु पाण्डेले सर्वाधिक १९ रन जोडिन् ।

बलिङमा मधेसका लागि रोजी कडारीले २ विकेट झारिन् । यसअघि फाप्ला क्रिकेट मैदानमा टस हारेर ब्याटिङको निम्ता पाएको मधेस १५ दशमलव ५ ओभरमा ४० रनमा अलआउट भयो । मधेसका कुनै पनि ब्याटरले दोहोरो अंकमा रन जोड्न सकेनन् ।

वाग्मतीका लागि  प्लेयर अफ द म्याचसमेत भएकी  कप्तान कञ्चन श्रेष्ठले ४ विकेट हात पारिन् । 

यसअघि आजै भएको पहिलो खेलमा कोसी प्रदेशमाथि ९ विकेटको सानदार जित दर्ता गर्दै त्रिभुवन आर्मी क्लब समूह विजेताको रूपमा सुपर ४ मा पुगिसकेको छ । 

समूह बी मा रहेको कोसी र मधेस भने प्रतियोगिताबाट बाहिरिसकेका छन् । उता समूह ए बाट एपिएफ विजेता र सुदूरपश्चिम उपविजेता भएर सुपर ४ मा सुरक्षित भइसकेका छन् । माघ १ गतेदेखि सुरु भएको प्रतियोगिता माघ १२ गते सम्पन्न हुनेछ ।

प्रतियोगिताको उपाधि जित्नेले पाँच लाख, दोस्रो हुनेले तीन लाख, प्लेयर अफ द सिरिजलाई ५० हजार, बेस्ट ब्याटर र बेस्ट बलरलाई २५/२५ हजार रुपैयाँ पुरस्कार दिइनेछ ।रासस