रायपुर । भारतीय सुरक्षा बलसँगको भिडन्तमा मंगलबार एक शीर्ष कमान्डरसहित कम्तीमा १४ जना माओवादी विद्रोहीको मृत्यु भएको छ । भारतीय गृह मन्त्रालयले यसलाई हालैका लडाइँमध्ये सबैभन्दा ठूलो भनेको छ । 

मन्त्रालयले मारिएका कमान्डर जयराम वा चलपति भनेर चिनिने नेता भएको र उनको टाउकोमा एक लाख १५ हजार डलरको इनाम रहेको जनाएको छ ।

नयाँदिल्लीले दशकौँ लामो द्वन्द्व अन्त्य गर्ने प्रयासलाई तीव्र पारेको छ । भारतको छत्तीसगढ राज्यको जंगलमा रहेका छापामारको गढमा जनवरी १६ मा १२ जना माओवादी मारिएपछि मंगलबारको झडप भएको हो ।

भारतको स्रोतसम्पन्न मध्यक्षेत्रमा सीमान्तकृत जनताको अधिकारका लागि लड्दै आएका विद्रोहीले गरेको दशकौँ लामो विद्रोहमा १० हजारभन्दा बढी मानिसको मृत्यु भएको छ । सरकारी तथ्यांकअनुसार सन् २०२४ मा करिब २८७ विद्रोही मारिएका थिए ।

नक्सलाइट भनेर पनि चिनिने विद्रोहीहरू चिनियाँ क्रान्तिकारी नेता माओत्से तुङबाट प्रेरित थिए । नक्सलाइट सन् १९६७ मा उनीहरूको सशस्त्र अभियान सुरु भएको जिल्लाको नामबाट राखिएको हो ।

“नक्सलवादलाई अर्को ठूलो झट्का”, गृहमन्त्री अमित शाहले १४ विद्रोहीलाई ‘समाप्त’ बनाएको पुष्टि गर्दै विज्ञप्तिमा भनेका छन् । 

विद्रोहीलाई परास्त गर्न सन् २०२६ मार्चको समयसीमा तय गरेका शाहले ‘नक्सलवादले अन्तिम सास फेरिरहेको’ बताए । 

यस क्षेत्रमा अतिरिक्त बल पठाइएको प्रहरीले जनाएको छ । “सुरक्षा बल अझै जंगलभित्र छ”, छत्तीसगढको माओवादीविरोधी अभियानका प्रमुख विवेकानन्द सिन्हाले भने । 

माओवादीहरूले स्थानीय बासिन्दाका लागि जग्गा, रोजगारी र यस क्षेत्रको अपार प्राकृतिक स्रोतको हिस्सा माग गर्दै आएका छन् ।

उनीहरूले भारतको पूर्व र दक्षिणका विभिन्न दुर्गम समुदायमा प्रवेश गरेर सन् २००० को सुरुआतसम्म आन्दोलन शक्ति र संख्यामा बढ्दै गयो । त्यसपछि नयाँदिल्लीले ‘रेड करिडोर’ भनिने क्षेत्रमा हजारौँ सैनिक तैनाथ गर्‍याे ।

यस द्वन्द्वमा सरकारी बलमाथि पनि धेरै घातक आक्रमण भएका छन् । यस महिना सडक किनारमा भएको बम विस्फोटमा कम्तीमा नौजना भारतीय सैनिकको मृत्यु भएको छ ।रासस/एएफपी