काठमाडौं । प्रधानमन्त्री केपी शर्मा ओलीले जलवायु परिवर्तनका कारण नेपालले बहुसंकटको सामना गर्नुपरेको बताएका छन् ।

मंगलबार सगरमाथा संवाद कार्यक्रमको शुभारम्भ गर्दै प्रधानमन्त्री ओलीले नेपालले विश्वव्यापी रूपमा बहुप्रकोपीय संकटको सामना गर्नु परिरहेको उल्लेख गरे । उनले प्रकृतिमाथिको दोहनले जलवायु परिवर्तनका दर बढाइरहेको र नेपालले त्यसको प्रत्यक्ष प्रभाव व्यहोर्नु परेको उल्लेख गरे । समकालीन मुद्दाहरूलाई सम्बोधन गर्दै बहु–संकटको सामना गर्न साझा संकल्प जरुरी रहेको बताए ।

२०१९ मा नै सगरमाथा संवादको परिकल्पना गरे पनि कोरोना लगायतका कारण सफल हुन नसकेको बताए । संवाद गर्नको लागि अन्तर्राष्ट्रिय मञ्चहरूको कमी नभए पनि सगरमाथा संवादले जलवायु परिवर्तनका कारण नेपाल लगायतका देशहरूले भोग्नुपरेको समस्याका बारेमा उजागर गर्न सकिने र विश्वको ध्यान केन्द्रित गर्न सकिने बताए ।

प्रधानमन्त्री ओलीले नेपालको शान्ति प्रक्रियाले विश्वलाई धेरै कुराहरू सिकाउन सक्ने पनि बताए । नेपालमा राजनीतिक मुद्दाहरू धेरै हदसम्म समाधान भइसकेकाले सामाजिक–आर्थिक रूपान्तरणमा पूर्ण रूपमा केन्द्रित रहेको धारणा राखे । नेपालको राष्ट्रिय आकांक्षा ‘समृद्ध नेपाल, सुखी नेपाली’ आर्थिक समानता र सामाजिक कल्याणमा आधारित रहेको बताए ।