काठमाडौं । सांसदहरूले संघीय संसद्को हिउँदे अधिवेशन विधेयक निर्माणका हिसाबले सफल भएको बताएका छन् । अधिवेशन अन्त्य भएपछि मंगलबार संसद् भवन नयाँ बानेश्वरमा सञ्चारकर्मीसँग कुरा गर्दै उनीहरूले हिउँदे अधिवेशन विभिन्न घटनाक्रम भए पनि विधेयक निर्माणका हिसाबले सफल भएको बताएका हुन् । 

नेकपा एमालेका सांसद योगेश भट्टराईले हिउँदे अधिवेशनमा १३ वटा विधेयक पारित भएको भन्दै विगतको तुलनामा महत्त्वपूर्ण उपलब्धि रहेको उल्लेख गरे । यसबीचमा विषयगत समितिले पनि गम्भीरतापूर्वक काम गरेको र सरकारले समेत महत्त्वपूर्ण विधेयक प्रस्तुत गरेको उनले बताए । 

त्यस्तै, कांग्रेस सांसद रामहरि खतिवडाले संसदको विधेयक अधिवेशनमा २१ वटा कानुन निर्माण गर्ने प्रतिबद्धता गरेको भन्दै त्यसमध्ये महत्त्वपूर्ण विधेयक अघि बढेको बताए । सदन धेरै दिन बन्द गर्ने परिपार्टी अन्त्य भएको र राजनीतिक स्थायित्वका लागि दलहरू गम्भीर देखिएको उनले बताए । सरकारको कामकारबाहीमा चित्त नबुझेको भन्दै उनले गति बढाउनुपर्ने देखिएको धारणा राखे । 

त्यस्तै, रास्वपा सांसद सोबिता गौतमले हिउँदे अधिवेशन निकै चुनौतीपूर्ण देखिए पनि विधेयक अघि बढ्न सफल भएको बताइन् । उनले सदनको कामकारवाही नियन्त्रणमुखी देखिएको टिप्पणी गरिन् । 

हिउँदे अधिवेशनमा प्रतिनिधिसभाको २७ वटा बैठक बसेको थियो । अधिवेशनमा १२ वटा सरकारी र एउटा गैरसरकारी विधेयक दर्ता भएको थियो, जसमध्ये ५ वटा विधेयक संघीय संसद्को दुवै सभाबाट पारित भएका छन् भने ४ वटा विधेयक समितिमा विचाराधीन रहेका छन् । 

त्यस्तै, तीनवटा विधेयक प्रतिनिधिसभामा प्रस्तुत मात्रै भएका छन् । त्यस्तै राष्ट्रिय सभाबाट प्राप्त सातवटा विधेयकमध्ये चार विधेयकलाई पारित गरी प्रतिनिधिसभाले राष्ट्रिय सभा फिर्ता पठाएको छ ।