काठमाडौं । गायक तथा गीतकार सुशान्त केसीले फागुन २४ मा भक्तपुरको सल्लाघारी ग्राउन्डमा कन्सर्ट गर्ने भएका छन् । सुशान्तका ‘बार्दली’, ‘सारङ्गी’, ‘साथी’ र ‘आमा’ जस्ता हिट गीत छन् ।

उक्त कन्सर्टबारे जानकारी दिन आयोजित पत्रकार सम्मेलनमा केसीले लामो समयपछि काठमाडौं उपत्यकामा हुन लागेको कन्सर्टलाई लिएर उत्साहित रहेको बताए । उनले भने, “काठमाडौंमा प्रस्तुति दिनु सधैँ विशेष अनुभव हो । समर्थकहरूको माया मेरो प्रेरणा हो । सबैलाई संगीतको यो यात्रामा सहभागी गराउन उत्साहित छु ।” 

कन्सर्टका लागि टिकट खल्ती एपमार्फत खरिद गर्न सकिने आयोजकले प्रेस नोटमा उल्लेख गरेको छ । 

कन्सर्टका लागि टिकट मूल्य साधारण ९९०, फ्यानपिट एक हजार ४९९, भीआईपी दुई ४९९ रुपैयाँ तोकिएको छ । खल्ती एपले आइतबारदेखि नै टिकट बिक्री सुरु भइसकेको जनाएको छ ।

आयोजकले कन्सर्टमा करिब १५ हजार दर्शक उपस्थित हुने अपेक्षा गरेको छ । कन्सर्ट एसकेसी इंक र द रोयल नेपाल इभेन्ट्सको संयुक्त आयोजनामा हुन लागेको हो ।