काठमाडौं । प्रधानमन्त्री केपी शर्मा ओलीको चीन भ्रमणका दौरान भएका १० सम्झौतामध्ये एक हो, ‘फ्रेमवर्क फर बेल्ट एन्ड रोड कोअप्रेसन ।’ जुन ‘बीआरआई फ्रेमवर्क’ सम्झौताको रूपमा चिनिन्छ । 

बीआरआईभित्र १० परियोजना समेटिएका छन् । जसमा खेलकुद पूर्वाधारअन्तर्गत एउटा परियोजना राखिएको छ, ‘झापा स्पोर्ट्स र एथ्लेटिक्स कम्प्लेक्स ।’

प्रधानमन्त्री ओलीले २०८१ मंसिर १७ गतेदेखि २० गतेसम्म चीन भ्रमण गर्दा ‘बीआरआई फ्रेमवर्क’ सम्झौता भएको थियो । 

सम्झौतामा झापामा बनाउने भनिएको कम्प्लेक्सलाई यसरी व्याख्या गरिएको छ, “‘झापा स्पोर्ट्स एन्ड एथलेटिक्स कम्प्लेक्स’ एक बहुउद्देशीय कम्प्लेक्स हो जसमा आधुनिक र अत्याधुनिक स्टेडियम र व्यावसायिक खेलाडी र एथलिटहरूको प्रशिक्षणका लागि संरचनाहरू छन् ।”

सम्झौतामा कम्प्लेक्सबारे अझ बढी व्याख्या गरिएको छ, “यस कम्प्लेक्सले नेपालमा फुटबल, क्रिकेट र एथलेटिक्सजस्ता विभिन्न खेलहरूका लागि अन्तर्राष्ट्रिय मानकको सुविधाहरू प्रदान गरेर खेलाडीहरूको विविध आवश्यकताहरू सम्बोधन गर्ने लक्ष्य राख्छ । यस कम्प्लेक्सले क्षेत्रीय, राष्ट्रिय र अन्तर्राष्ट्रिय खेल प्रतिस्पर्धाहरूको आयोजना गरेर युवा सहभागिता प्रवर्धन गर्न योगदान पुर्‍याउने अपेक्षा गरिएको छ ।”

प्रधानमन्त्रीको चीन भ्रमणका बेला गएको मंसिर १८ गते बीआरआईबाहेक नौ सम्झौता भएका थिए । बीआरआई सम्झौतामा नेपाल र चीनका अधिकारीबीचको रस्साकस्सीका कारण सम्झौता एक दिन ढिला अर्थात् मंसिर १९ गते भएको थियो । 

एक दिनअघि नेपाल र चीनबीच बीआरआई सम्झौता हुन नसक्नुमा ‘ग्रान्ट’ शब्द तगारो बनेको थियो । भोलिपल्ट बदलामा ‘एड’ राख्न दुवै देश सहमति भएपछि एउटा खेलकुद पूर्वाधारसमेत समेटर ‘फ्रेमवर्क फर बेल्ट एन्ड रोड कोअप्रेसन’मा हस्ताक्षर भएको थियो ।

निकै मिहेनतपछि बीआरआईभित्र पारिएको खेलकुद पूर्वाधार ‘झापा स्पोर्ट्स एन्ड एथलेटिक्स कम्प्लेक्स’बारे भने नेपालका युवा तथा खेलकुद मन्त्रालय र राष्ट्रिय खेलकुद परिषद् (राखेप) अनभिज्ञ छन् ।

सम्झौता भएको डेढ महिना बितिसक्दा ‘झापा स्पोर्ट्स एन्ड एथलेटिक्स कम्प्लेक्स’बारे न परराष्ट्र मन्त्रालयले खेलकुद मन्त्रालयलाई जानकारी दिएको छ, न प्रधानमन्त्री तथा मन्त्रिपरिषद्को कार्यालयले नै । 

खेलकुदको सम्पूर्ण जिम्मेवारी सम्हालेका युवा तथा खेलकुद मन्त्रालय र राखेप आफैँले पनि ‘झापा स्पोर्ट्स एन्ड एथलेटिक्स कम्प्लेक्स’बारे बुझ्न जाँगर चलाएको देखिँदैन ।

युवा तथा खेलकुद मन्त्रालयका प्रवक्ता सुवासचन्द्र सिवाकोटी खेलकुदका सबै प्रोजेक्ट मन्त्रालयमार्फत सरकारसम्म पुग्ने भए पनि ‘झापा स्पोर्ट्स एन्ड एथलेटिक्स कम्प्लेक्स’बारे जानकारी मन्त्रालयमा नरहेको बताउँछन् । 

“प्रोजेक्ट जाने खेलकुद मन्त्रालयमार्फत नै हो । कसरी सञ्चालन गर्ने भन्नेबारे भने राष्ट्रिय खेलकुद परिषद्‌बाट हुने गर्छ । हामीलाई यसबारे खास जानकारी छैन,” खेलकुद मन्त्रालयका प्रवक्ता शिवाकोटीले बाह्रखरीसँग भने ।

यता राखेपका उच्च अधिकारी पनि ‘झापा स्पोर्ट्स एन्ड एथलेटिक्स कम्प्लेक्स’बारे आफूहरूलाई कुनै जानकारी नदिएको बताउँछन् । प्रधानमन्त्रीको चीन भ्रमणमा राखेपका कुनै पनि प्रतिनिधि नरहेकाले पनि यसबारे आफूहरूसँग जानकारी नभएको राखेपका एक उच्च अधिकारीले बताए ।

“प्रधानमन्त्री भ्रमण टोलीमा राखेपका प्रतिनिधि सामेल थिएनन् । प्रधानमन्त्री जानुभयो, सम्झौता भएको हामीले पनि समाचार पढेर थाहा पायौँ,” राखेपका ती अधिकारीले बाह्रखरीसँग भने, “तर, हामीलाई यसबारे मन्त्रालय र अन्य सम्बन्धित निकायबाट कुनै पनि आधिकारिक पत्र आएको छैन । त्यसैले उक्त स्पोर्ट्स कम्प्लेक्सबारे थप जानकारी दिन सकिने अवस्था छैन ।” 

झापा प्रधानमन्त्री ओलीको गृह जिल्ला हो । यसैकारण ‘बीआरआई’अन्तर्गत झापामा निर्माण गर्ने गरी स्पोर्ट्स कम्प्लेक्स समेटियो । तर, सरकार र चीनबीच सहमति बनिसक्दा समेत खेलकुदका अपरिहार्य दुई निकाय यसबारे बेखबर रहनु आश्चर्य लाग्दो छ ।