काठमाडौं । सुदूरपश्चिम प्रदेश सरकारका पूर्वआर्थिक मामिला तथा योजनामन्त्री नरेश शाहीले सुदूरपश्चिमलाई ‘विशेष प्रदेश’ घोषणाको माग गर्ने गरी अभियान छेड्ने बताएका छन् । सुदूरपश्चिमप्रति हुँदै आएको शासन र शोषणविरुद्ध विद्रोह गर्दै उनको नेतृत्वमा ‘स्वाभिमान सुदूरपश्चिम अभियान’को घोषणा गरिएको हो ।
 
नेकपा (एकीकृत समाजवादी)का प्रदेशसभा सदस्य शाहीले सुदूरपश्चिमलाई राजधानीले शासन र शोषण मात्रै गरेको निष्कर्षमा सुदूरपश्चिमका युवा पुगेको बताए । 

“सूदूरपश्चिमलाई सिंहदबार, राजधानीले शासन गरेको छ । शोषण गरको छ भन्ने निष्कर्षमा हामी पुगेका छौँ । ०१३ सालदेखिकै बजेट हेर्दा सुदूरपश्चिमलाई नौ प्रतिशत भन्दा बढी बजेट दिइएको छैन । दुई वर्षचाहिँ ११ र १२ प्रतिशत दिएको देखिन्छ । सुदूरपश्चिममा गरिबी ३४ प्रतिशत छ,” उनले बाह्रखरीसँग भने , “लगानी नगर्ने अनि उत्पादन कसरी हुन्छ ? रोजगारी कसरी सिर्जना हुन्छ ?”

अभियानले सुदूरपश्चिमलाई विकासको मूलधारमा ल्याउन दबाब पुग्ने उनले विश्वास व्यक्त गरे । संविधान संशोधनका क्रममा सुदूरपश्चिमलाई अग्राधिकार दिनुपर्ने माग रहेको उनले सुनाए ।
 
“अहिले संविधान संशोधन हुँदै छ । संविधान संशोधन गर्दा सुदूरपश्चिको हकअधिकार सुनिश्चित गर्नुपर्छ । विशेषाधिकारसहित क्षतिपूर्ति देऊ भन्ने हाम्रो माग हो,” उनले भने । 

शाहीले दबाबमूलक अभियान कुनै दलसँग आबद्ध नभएको दाबी पनि गरे । “एक–डेढ महिनामै समिति सार्वजनिक गर्ने योजना छ । यो कुनै राजनीतिक पार्टी, वाद दर्शन सिद्धान्तसँग सम्बन्धित छैन । सुदूरपश्चिमको अभियान हो, भ्रष्टाचार विरोधी अभियान हो । अकूत सम्पति कमाएका छन् । त्यसका लागि पनि छानबिन गर भन्ने माग छ । हाम्रो माग नसुने संघका लागि पनि त्यो महँगो पर्छ,” शाहीको चेतावनी छ ।