काठमाडौं । भारतीय राष्ट्रिय क्रिकेट टिमले च्याम्पियन्स ट्रफी–२०२५ पाकिस्तानमा नखेल्ने भएको छ । विश्व क्रिकेटको सर्वोच्च निकाय आईसीसीले बिहीबार च्याम्पियन्स ट्रफी हाइब्रिड मोडेलमा सञ्चालन हुने जनाउँदै भारतका खेल भने पाकिस्तान बाहिर हुने बताएको हो । यसको बदलामा भारतमा हुने कुनै पनि आईसीसीका इभेन्टमा पाकिस्तानले नखेल्ने भएको छ । आईसीसीले नै भारतमा हुने प्रतियोगितामा पाकिस्तानका खेल भने तटस्थ भूमीमा हुने जनाएको हो ।

च्याम्पियन्स ट्रफी–२०२५ को आयोजक राष्ट्रको रुपमा पाकिस्तान छनोट भएको छ । तर, यो प्रतियोगितामा भारतका खेल भने पाकिस्तान बाहिर तटस्थ भूमीमा हुनेछ । यस्तै, सोही वर्ष भारतमा हुने महिला एकदिवसीय विश्वकप र २०२६ को ट्वान्टी–२० विश्वकपमा पाकिस्तान खेल भारतबाहिर हुनेछ । 

च्याम्पियन्स ट्रफीमा आठ टोलीले प्रतिस्पर्धा गर्नेछन् । यसअघि सन् २०१७ मा भएको पछिल्लो संस्करणको उपाधि पाकिस्तानले जितेको थियो । पाकिस्तानले उक्त संस्करणको फाइनलमा भारतलाई नै हराएर उपाधि जितेको थियो ।