काठमाडौं । चलचित्र ‘वसन्त’को छायांकन सकिएको छ । गायक तथा अभिनेता प्रकाश सपूतको डेब्यु निर्देशन रहेको चलचित्रको छायांकन ३८ दिनमा प्याकअप भएको हो । 

चलचित्रको छायांकन बागलुङ, काठमाडौं र तराईका विभिन्न ठाउँमा गरिएको छ ।

चैत २२ गते प्रदर्शनको तयारीमा रहेको चलचित्रको निर्माणमा आफू र आफ्नो टिमले निकै मिहिनेत गरेको र काम पनि राम्रो निस्किएको अभिनेता तथा निर्देशक प्रकाशले बताएका छन् । 

सिनेमामा प्रकाशसँगै स्वस्तिमा खड्का, प्रभात पाल ठकुरी, खड्क बहादुर पुन (खबपु), शिवांशी श्री, अनुप बराल, कमलमणी नेपाल, प्रकाश घिमिरेलगायत कलाकारको अभिनय रहनेछ । 

सोसल ड्रामा सिनेमामा कथा, पटकथा र संगीत पनि प्रकाशले नै लेखेका छन् । विपन्न विश्वकर्मा समुदायको छोराको लेखक बन्ने सपना पूरा गर्न उसले गर्ने संघर्षको कथा ‘वसन्त’ले भन्नेछ ।