काठमाडौं । चलचित्र ‘फेरि रेशम फिलिली’मा यसका मुख्य कलाकार विनय श्रेष्ठ पुरानै गेटअपमा देखिने भएका छन् । मुख्य कलाकार विनय नौ वर्षअघि प्रदर्शन भएको चलचित्र ‘रेशम फिलिली’कै लुक्स र गेटअपमा देखिने भएका हुन् । 

पोस्टरमा सुपुष्पाले मुस्कुराउँदै हातमा रातो गुलाब लिएकी छन् । सार्वजनिक पोस्टरले उनीहरूबीचको प्रेम दर्शाउँछ । यो पोस्टरले सिनेमा सिरिज नभएर सिक्वेल भएको प्रष्ट पार्छ । 

यसैबीच, ‘फेरि रेशम फिलिली’को प्रदर्शन मिति घोषणा गरिएको छ । पोस्टर सार्वजनिक गर्दै निर्माणपक्षले फागुन १४ गते महाशिवरात्रिलाई सिनेमाको प्रदर्शन मिति घोषणा गरेको हो ।

रौनक विक्रम कडेलको लगानीमा निर्माण भएको चलचित्रको पोस्टरमा मुख्य अभिनेता विनय श्रेष्ठ र अभिनेत्री सुपुष्पा भट्ट प्रस्तुत छन् । 

‘रेशम फिलिली’मा भने विनयको जोडी अभिनेत्री मेनुका प्रधानसँग बाँधिएको थियो । यसपटक मेनुकाको स्थानमा सुपुष्पा छिन् । 

निरोज महर्जनको निर्देशन रहेको चलचित्रमा विनय र सुपुष्पासँगै नीर शाह, कामेश्वर चौरासिया, प्रकाश घिमिरे, शिशिर वांदेल, रवीन्द्र झा, लक्ष्मी गिरी, महेश त्रिपाठी, एवनराज उप्रेती, मेक्सम गौडेल, प्रकाश घिमिरे, सजन थापालगायतको अभिनय रहनेछ ।

सिनेमाको कार्यकारी निर्मातामा सुरज बम ठकुरी छन् । सुसन प्रजापतिको छायांकन, निर्देशक महर्जन र आकाश बरालको पटकथा छ ।