काठमाडौं । नेपाल प्रिमियर लिग (एनपीएल)को पहिलो क्वालिफायरमा सुदूरपश्चिम रोयल्ससामु जनकपुर बोल्ट्सले १४० रनको लक्ष्य प्रस्तुत गरेको छ । बुधबार कीर्तिपुरस्थित त्रिवि क्रिकेट मैदानमा टस जितेर ब्याटिङमा उत्रिएको जनकपुरले निर्धारित २० ओभरमा नौ विकेट गुमाएर १३९ रन बनाएको हो ।

जनकपुरका जिम्मी निसमले सर्वाधिक ४५ रन बनाए । अर्धशतकबाट पाँच रनले चुकेका निसमले २३ बलमा तीन चौका र तीन छक्का प्रहार गरे । निसमलाई १९औँ ओभरको चौथो बलमा स्कट कुग्गेलेनले बोल्ड गरे ।

शुभ कंसाकारले २४ बलमा चार चौकासहित २६ रन जोडे । शुभलाई नवौँ ओभरको अन्तिम बलमा दीपेन्द्रसिंह ऐरीले रनआउट गरेका थिए ।

ओपरन लहिरु मिलान्थाले १२ रन थप्दा कप्तान आसिफ शेख र अरनिको यादवले समान ११ रन बनाए । नियमित कप्तान अनिल साह हातमा लागेको चोटका कारण खेल्न नसक्ने हुँदा आसिफले कप्तानको जिम्मेवारी पाएका हुन् ।

शेर मल्लले दुई तीन बलमा तीन रन थपे । आकाश त्रिपाठी चार रनमा अविजित रहे । किशोर महतोले दुई रन जोडे ।

सुदूरपश्चिमका कप्तान दीपेन्द्रसिंह ऐरीले तीन विकेट लिए । सैब जैबले दुई विकेट लिए । दीपेन्द्रले जनकपुरका ओपनर लहिरु मिलान्था, अरनिको यादव र मोहसिन मोहमदको विकेट लिएका हुन् । जैबले आसिफ शेख र हर्ष थाकेरको विकेट लिए ।

स्कट कुग्गेलेन र अभिनाश बोहराले समान एक विकेट लिए । कुग्गेलेन निसमलाई पभेलियनको दिशा देखाएका थिए । अभिनाशले शेर मल्ललाई ब्रान्डन म्याकमुलमबाट क्याच गराए ।

यी दुई टिमबीच लिग चरणमा भएको खेलमा सुदूरपश्चिमले जनकपुरविरुद्ध ७२ रनको सहज जित निकालेको थियो ।

लिग चरणमा शीर्ष स्थान हासिल गरेको सुदूरपश्चिमले सात खेलबाट १२ अंक जोेडेको थियो । समान खेलबाट १० अंक जोडेको जनकपुर दोस्रो स्थानमा रहँदै प्लेअफमा आइपुगेको हो ।

आजको खेलमा जित निकाल्ने टिमले सोझै फाइनल यात्रा तय गर्नेछ । पराजित हुने टिमले भने इलिमिनेटर विजेता कर्णाली याक्ससँग दोस्रो क्वालिफायरमा प्रतिस्पर्धा गर्नेछ ।