काठमाडौं । नेपाल प्रिमियर लिग (एनपीएल)को लिग चरण समाप्त हुँदा सबैभन्दा धेरै रन बनाउने खेलाडीको शीर्ष स्थानमा लुम्बिनी लायन्सका कप्तान रोहितकुमार पौडेल छन् ।

तालिकाको पुछारमा रहँदै प्रतियोगिताको अन्त्य गरेको लुम्बिनीले सात खेल खेल्दा दुई अंक मात्र जोडेको थियो । तर, टिमको प्रदर्शन खराब रहे पनि उत्कृष्ट लयमा रहेका रोहित हालसम्म लिगको सबभन्दा धेरै रन बनाउने खेलाडीमा कायम रहेका हुन् ।

रोहितले लुम्बिनीबाट सात खेल खेल्दा दुई अर्धशतकसहित २७९ रन बनाएका छन् । बलिङतर्फ पनि उस्तै प्रदर्शन गरेका रोहितले सात खेलमा आठ विकेट लिएका छन् ।

ब्याटिङमा रोहितलाई पछ्याइरहेका चितवन राइनोजका रवि बोपाराले सात खेलमा २३३ रन बनाएका छन् । रोहितलाई उछिन्न बोपाराले इलिमिनेटरमा कर्णाली याक्सविरुद्ध ४७ रन बनाउनु पर्ने हुन्छ ।

यस्तै, यो सूचीको तेस्रो स्थानमा रहेका पोखरा एभेन्जर्सका आन्द्रियस गौसले ६ इनिङमा २२४ रन बनाएका छन् ।