काठमाडौं । नेपाल प्रिमियर लिग (एनपीएल)मा पोखरा एभेन्जर्सले काठमाडौं गुर्खाजलाई १३९ रनको लक्ष्य दिएको छ । शनिबार कीर्तिपुरस्थित त्रिवि क्रिकेट मैदानमा टस जितेको काठमाडौंले फिल्डिङ रोजेपछि ब्याटिङको निम्तो पाएको पोखराले आठ विकेटको क्षतिमा १३८ रन जोडेको हो ।

पोखराका रेमोन रेफरले सर्वाधिक ४१ रन बनाए । उनले ३० बलमा एक चौका र तीन छक्का प्रहार गरे । ओपनर दीनेश खरेलले ३८ रन बनाए । दिनेशले २५ बलमा ६ चौका र एक छक्का प्रहार गरे ।

दिलीपनाथले २४ बलमा दुई छक्कासहित २७ रन बनाए । यसबाहेक, पोखराका अन्य ब्याटर दोहोरो अंकसम्म पुग्न सकेनन् ।

पोखराका अर्का ओपनर आन्द्रियस गौस ‘डक’ भए । कप्तान कुशल भुर्तेलले सात रन थप्दा विपिन खत्रीले चार रन बनाए । माइकल लियस्कले स्कोरबोर्डमा एक रनमात्र थपे । यस्तै, नारायण जोशी भने ‘गोल्डेन डक’ भए । 

पोखराविरुद्ध काठमाडौंका कप्तान करण केसी र राशिद खानले समान तीन विकेट लिए । चार ओभर बलिङ गरेका करणले २४ रनमात्र खर्चिए । यस्तै, गेरहार्ड इरास्मस र माइकल लेभिटको नाममा समान एक विकेट रह्यो ।

प्रतियोगिताको प्लेअफ सम्भावना कायम राख्न दुवै आज जितको दबाबमा छन् । पाँच खेलबाट समान चार अंक जोडेका काठमाडौं र पोखरा क्रमशः तालिकाको छैटौँ र सातौँ स्थानमा छन् ।