काठमाडौं । नेपाली सेनाका पूर्वसहायक रथी डा. प्रेमसिंह बस्न्यातले आफ्नो एक्स (पूरानो टुइटर) अकाउन्ट हटाएका छन् । बस्न्यातले एक्समार्फत नेताहरूलाई मार्ने, जर्मनका तानाशाह हिटलरले जस्तै ग्याँस च्याम्बरमा हाल्ने धम्की दिने गर्थे । उनले आफ्नै पूर्वसंगठन नेपाली सेना र सेनाका उच्च पदस्थ अधिकारीलाई पनि एक्समार्फत गालीगलौज गर्दै आएका छन् ।

उनले सामाजिक सञ्जाल एक्समा गरेका पोष्टहरू विश्लेषण गरेर बाह्रखरीले ‘पूर्वजर्नेलको हिटलर’ बन्ने चाह ! सामाजिक सञ्जालबाट गालीगलौजदेखि हत्याको धम्कीसम्म’ शीर्षकको समाचार प्रकाशित गरेको थियो ।

बस्न्यातले आफ्नो एक्स अकाउन्ट हटाए पनि उनले गालीगलौज र हत्याको धम्की दिँदै  लेखेका पोष्ट भने बाह्रखरीले अकाईभमा सुरक्षित राखेको छ ।

“तपाईंले आफ्नो एक्स अकाउन्ट डिलिट/हटाउनु भएको हो ?” भनेर बस्न्यातलाई बाह्रखरीले प्रश्न गरेको थियो ।

जवाफमा उनले आफूलाई थाहा नभएको बताए । उनले भने, “मलाई थाहा छैन, म बाहिर बाहिरै छु ।”

त्यसपछि बाह्रखरीले उनको एक्स अकाउन्टमा राखिएको नाम र ह्यान्डल सुनाएपछि उनले भने, “मलाई थाहा छैन । मलाई मेरो टुइटरमा नाम के छ भनेर थाहा छैन । म हेर्छु ।”

२० मंसिरमा बाह्रखरीले उनलाई “सामाजिक सञ्जालमा सैनिक आचारसंहिता उल्लंघन गर्दै, नेताहरूको चरित्र हत्या किन गर्नुहुन्छ ?” भनेर सोधेको थियो ।

उनले आफूले अहिले ‘त्यस्तो’ लेख्न छाडिसकेको दाबी गरेका थिए । त्यसपछि बाह्रखरीले उनलाई ३ डिसेम्बरमा लेखेको पोष्ट सुनाएको थियो । त्यसको प्रतिक्रियामा उनले “अहिले त्यस्तो लेख्न छाडिसके । उहिले लेख्थे, अहिले त लेख्दिनँ, अहिले बन्द गरिसके । अहिले राम्रा कुराहरू मात्र लेख्छु” भनेका थिए ।

पूर्वजर्नेलको ‘हिटलर’ बन्ने चाह ! सामाजिक सञ्जालबाट गाली–गलौजदेखि हत्याको धम्कीसम्म