काठमाडौं । तोरणविक्रम शाही समग्रमा ११–अन्डर २०५ को स्कोरमा सूर्य नेपाल सेन्ट्रल ओपनको तेस्रो दिन पनि शीर्ष स्थानमा कायमै रहन सफल भएका छन् । गोकर्ण गल्फ क्लबमा बुधबार तोरणले ११–अन्डर ७१ स्कोर गरे । 

अन्तिम १८ होलको खेल बाकी छँदा तोरणले एमेच्योरद्वय सद्भाव आचार्य र राहुल विकेलाई चार स्ट्रोकले पछि पार्दै उपाधि जित्ने सम्भावनालाई बलियो बनाएका छन् । तोरणले ६ होल सकिँदा चार बर्डी प्रहार गरिसकेको थिए । पहिलो, दोस्रो, पाँचौँ र छैटौँ होलमा एक–एक सट बचाए । 

नवौँ होलमा भने दिनको पहिलो बोगी खेपे । फ्रन्ट नाइन ३–अन्डर ३३ मा पूरा गरे । नवौँ होलको बोगीपछि उनले लय गुमाए । १२औँ होलमा एक सट खेर फाले । लगतै १३औँ होलमा बर्डी प्रहार गरे पनि १५औँ र १६औँ होलमा एक–एक सट खेर फाले । जसले गर्दा ब्याक नाइन २–ओभर ३८ मा सकाउन बाध्य भए । 

एमेच्योरद्वय सद्भाव आचार्य र राहुल विके समग्रमा ७–अन्डर २०९ को स्कोरमा संयुक्त रूपमा दोस्रो स्थानमा रहे । गोकर्ण गल्फ क्लबमा आज एमेच्योर तथा डिफेन्डिङ च्याम्पियन सद्भाव आचार्यले दिनको उत्कृष्ट स्कोरकार्ड निकाल्दै उनी पाँच स्थान माथि उक्लिए । पहिलो, तेस्रो र सातौँ होलमा एक–एक सट बचाउँदा फ्रन्ट नाइनमा ३–अन्डर ३३ को नतिजा निकाले । यसपछि ११औँ देखि १४औँ होलमा लगातार चार बर्डी प्रहार गर्न सफल रहे । १५औँ होलको बोगीले ब्याक नाइन ३–अन्डर ३३ मा पूरा गरे । 

राहुल २–अन्डर ७० को स्कोर दर्ज गर्दै दुई स्थान माथि उक्लिए । उनले सातौँ र नवौँ होलमा बर्डी प्रहार गर्दै फ्रन्ट नाइन बोगीरहित खेले । यसपछि ११औँ होलको बोगीविरूद्ध १५औँ होलको बर्डीले ब्याक नाइन इभन–पार ३६ मा सकाए । 

धरानका प्रो निरज तामाङले १–अन्डर ७१ को स्कोर जोडे । समग्रमा ४–अन्डर २१२ सहित चौथो स्थानमा उक्लिए । दाबेदार नेपाल नम्बर एक भुवन नगरकोटीले ५–ओभर ७७ को खराब प्रदर्शन गरे । यो प्रदर्शनमा उनी समग्रमा १–अन्डर २१५ सहित पाँच स्थान तल झरे । 

चार दिनसम्म चल्ने प्रतियोगिताको कुल नगद पुरस्कार आठ लाख ८२ हजार छ । जहाँ विजेताले एक लाख ५० हजार, तथा दोस्रो र तेस्रो हुने खेलाडीहरूले क्रमशः एक लाख र ७५ हजार प्राप्त गर्नेछन् ।