काठमाडौं । नेपाल प्रोफेसनल गल्फर एसोसिएसन (एनपीजीए)को आयोजनामा हुने सूर्य नेपाल गल्फ टुर २०२४/०२५ को तालिका सार्वजनिक भएको छ । आयोजक एनपीजीएले आइतबार पत्रकार सम्मेलन गरे टुरमा रहेको आठ इभेन्टको तालिका सार्वजनिक गरेको हो ।

तालिका अनुसार, सिजनको पहिलो इभेन्ट, सूर्य नेपाल सेन्ट्रल ओपन नोभेम्बर २५ (सोमबार)देखि २८ (बिहीबार)सम्म सञ्चालन हुने छ । इभेन्ट गोकर्ण फरेस्ट गल्फ क्लब काठमाडौंमा हुने छ । इभेन्टमा ३३ प्रोफेसनल र सात एमेच्योर गरी कुल ४० गल्फरले सहभागिता जनाउने छन् ।

बहत्तर होलमा खेलाइने इभेन्टको पहिलो चरणमा ३६ होल हुने छ । जसमध्ये शीर्ष २१ भित्र पर्ने गल्फर दोस्रो चरणमा प्रवेश गर्ने छन् ।

इभेन्टको कुल पुरस्कार राशि आठ लाख ८२ हजार रुपैयाँ हुने छ । इभेन्टको विजेताले एक लाख ५० हजार प्राप्त गर्ने छन् । यस्तै, दोस्रो र तेस्रो हुनेले क्रमशः एक लाख र ७५ हजार रुपैयाँ प्राप्त गर्ने छन् ।

आयोजकले एमेच्योर नम्बर वान खेलाडी सद्‌भाव आचार्यसँगै भुवन नगरकोटी, निरज तामाङ, धाना थापा, सञ्जय लामा, रवि खड्का, तोरन शाही, कुमार कामी गरी आठ खेलाडीलाई इभेन्टको उपाधि दाबेदारको रूपमा लिएको छ ।

पत्रकार सम्मेलनमा नेपाल गल्फ संघ (एनजीए)का महासचिव दीपक आचार्य र एनपीजीएका अध्यक्ष रवीन्द्र मान श्रेष्ठ उपस्थित थिए ।

“आगामी एसियाली खेलकुदमा हामीले पदकको लक्ष्य राखेका छौँ । डेढ दशकको यो यात्रामा हामीले गल्फमा ठूलै फड्को मारेका छौँ,” आचार्यले भने, “यो टुरले हाम्रो पदकको लक्ष्यमा सहयोग मिल्ने छ भन्ने विश्वास गरेका छौँ । हामी यसमा मिहिनेत गरिरहेका छौँ ।”

सिजनको दोस्रो इभेन्ट सूर्य नेपाल काठमाडौं ओपन डिसेम्बर १० देखि १३ सम्म रोयल नेपाल गल्फ क्लब, काठमाडौंमा हुने छ । तेस्रो इभेन्ट सूर्य नेपाल इस्टर्न ओपन डिसेम्बर २३ देखि २६ सम्म धरान गल्फ क्लब धरानमा हुने छ ।

चौथोँ इभेन्ट सूर्य नेपाल वेस्टर्न ओपन २०२५ को जनवरी २१ देखि २४ सम्म हिमालयन गल्फ क्लब, पोखरामा हुने छ । पाँचौँ इभेन्ट सूर्य नेपाल च्यालेन्ज फेब्रुअरी ११ देखि १४ सम्म हुने छ । यो इभेन्टको आयोजना स्थल आयोजकले अझै पनि निर्धारण गरेको छैन । 

सिजनको छैटौँ इभेन्ट सूर्य नेपाल एनपीजीए टुर च्याम्पियनसिप मार्च १७ देखि २० सम्म गोकर्ण फरेस्ट क्लबमा हुने छ । सातौँ इभेन्ट सूर्य नेपाल एनपीजीए म्याच प्ले अप्रिल ८ देखि १० सम्म रोयल नेपाल गल्फ क्लबमा हुने छ । 

सिजनको अन्तिम इभेन्ट सूर्य नेपाल प्रिमियर गल्फ च्याम्पियनसिप गोकर्ण फरेस्ट क्ल्बमा हुने छ । यो सबैभन्दा धेरै धन राशि भएको इभेन्ट हो । यस इभेन्टको पुरस्कार राशि १६ लाख १९ हजार रुपैयाँ छ ।

सिजन ०२४–२५ को पुरस्कार राशि ६७ लाख ३२ हजार रुपैयाँ छ ।