काठमाडौं । चलचित्र ‘तेल भिसा’की नायिका तथा निर्माता ऋचा घिमिरे र निर्देशक शंकर घिमिरेविरुद्ध ठगीको आरोपमा उजुरी परेको छ । काठमाडौं प्रहरी परिसरमा उनीहरूविरुद्ध ठगीको उजुरी परेको हो । 

अमेरिका लगिदिने भन्दै पैसा लिएर अमेरिका नलगेको र पैसा फिर्ता पनि नगरेको भन्दै उनीहरूविरुद्ध उजुरी परेको प्रहरीले जनाएको छ । 

“अमेरिका लगिदिन्छु भनेर पैसा लिएको तर अमेरिका पनि नलगेको र पैसा फिर्ता माग्दा पनि नदिएको भन्दै उजुरी परेको छ,” एक उच्च प्रहरी अधिकारीले भने, “घटनाको वास्तविकता के हो हामी अध्ययन गरिरहेका छौँ ।” 

ऋचा र शंकर दुवै लामो समयदेखि अमेरिका बस्दै आएका छन् । ‘तेस भिसा’मा ऋचाको लगानी र अभिनय दुवै छ । 

यो चलचित्रमा शंकरको लेखन तथा निर्देशन छ । ‘तेल भिसा’ यही मंसिर ७ गते रिलिज हुँदैछ । 

‘तेल भिसा’मा अभिनेता विपीन कार्की, वर्षा राउत, पूजा चन्द, बुद्धि तामाङ, सुचित्रा उप्रेतीलगायतको अभिनय छ । 

अनिल पाण्डे र शिवराज कार्कीको लगानी रहेको चलचित्रका कार्यकारी निर्माता प्रिन्स युवराज कार्की र श्रुती दाहाल हुन् । ‘तेल भिसा’ मंसिर ७ गते रिलिज हुँदै छ ।