काठमाडौं । सरकारले पूर्ण सञ्चालन गर्ने उद्देश्यका साथ धेरैखाले छुट सुविधा दिएपछि गौतमबुद्ध अन्तर्राष्ट्रिय विमानस्थलबाट पाँच कम्पनीले उडान सुरु गरेका छन् । जजिरा, थाई एयर एसिया, कतार एयरवेज, फ्लाई दुवई र नेपाल एयरलाइन्सले उडान सुरु गरेका हुन् ।
 
पाँच कम्पनीको उडानसँगै दुई वर्षसम्म सुनसान रहेको विमानस्थलमा चहलपहल बढेको छ । यसअघि उडान गरिसकेको जजिरा एयरवेजले सातामा तीन दिन (मंगलबार, बिहीबार र शनिबार) बिहान साढे ७ बजे भैरहवा आउने र साढे ८ बजे भैरहवाबाट कुवेतका लागि उडान गरिरहेको छ ।

यस्तै फ्लाई दुवईले दैनिक दुबई–भैरहवा–काठमाडौं एउटा उडान गरिरहेको छ । फ्लाई दुवईले भैरहवा अवतरण गरी त्यहाँबाट यात्रु लिएर काठमाडौंमा अवतरणसँगै यात्रु चढाएर फर्कनेछ ।

यस्तै कतार एयरवेजले पनि भैरहवाबाट उडान सुरु गरिसकेको छ । कतारले दोहा–भैरहवा–काठमाडौं दैनिक एउटा उडान सुरु गरिसकेको छ । हाल कतारले दोहाबाट काठमाडौं दैनिक ‍३ वटा उडान गरिरहेको छ ।

नेपाल वायुसेवा निगम (नेपाल एयरलाइन्स) ले पनि भैरहवाबाट उडान गरिरहेको छ ।  नेपाल एयरलाइन्सले दुबईबाट भैरहवामा शनिबारदेखि उडान सुरु गरेको छ । त्यसअघि निगमले मलेसिया क्वालालाम्पुरबाट भैरहवा हुँदै काठमाडौं उडान गरिरहेको थियो ।
 
थाई एयर एसियाले पनि काठमाडौंपछि भैरहवामा पनि उडान सुरु गरेको छ । असोज १६ गतेबाट काठमाडौं उडान सुरु गरेको थाई एयर एशियाले कात्तिक १८ देखि बैंकक–भैरहवा–काठमाडौं उडान गरेको छ । उक्त वायुसेवाले सोमबार र बिहीबार गरी सातामा गरिरहेको नागरिक उड्ड्यन प्राधिकरणले जनाएको छ ।

त्रिभुवन अन्तर्राष्ट्रिय विमानस्थल कात्तिक २३ गतेदेखि १० घण्टा बन्द छ । ‘विमानस्थलको ट्याक्सी वे’ निर्माण गर्न क्यानले ५ महिनाका लागि राति १० बजेदेखि बिहान ८ बजेसम्म विमानस्थल बन्द गरेको छ । त्रिभुवन अन्तर्राष्ट्रिय विमानस्थलका १० घण्टा बन्द हुने भएपछि क्यानले ३० प्रतिशत उडान भैरहवाबाट गर्नुपर्ने शर्त राखेसँगै विमान कम्पनीहरू भैरहवातर्फ लागेका हुन् ।

यसअघि संस्कृति पर्यटन तथा नागरिक उड्डयान मन्त्रालयले गौतबुद्ध र पोखरा विमानस्थल सञ्चालनका लागि प्याकेज समेत ल्याएको थियो । हवाइ टिकटमा रहेको भ्याट छुट वा फिर्ता, इन्धनमा सहुलियत, भिषा सेन्टर स्थापना, हवाइ सेवा शुल्कमा लाग्ने तीन हजार यात्रु सेवा शुल्क छुट दिइएको छ ।

त्यसअतिरिक्त पार्किङ, ल्याण्डिङ, नेभिगेशन शुल्क छुट दिने, एक हजार पर्यटन शुल्क पूर्ण छुट, ग्राउण्ड ह्याण्डलिङमा ७५ प्रतिशत छुटलगायतका कार्ययोजनापछि अन्तर्राष्ट्रिय हवाइ सेवा कम्पनीहरूले भैहवातर्फ पनि सोझिएका हुन् । 

गत साउन २८ गते बसेको मन्त्रिपरिषद् बैठकले नागरिक उड्डयन क्षेत्रको समग्र सुधार कार्ययोजना तथा गौतमबुद्ध र पोखरा अन्तर्राष्ट्रिय विमानस्थल सञ्चालनसम्बन्धी कार्ययोजनासमेत स्वीकृत गरेको थियो । 

तर, पोखरा विमानस्थलमा हालसम्म कुनै पनि अन्तराष्ट्रिय कम्पनीले उडान गरेका छैनन् । सरकारले त्रिभुवन अन्तर्राष्ट्रिय विमानस्थलपछि भैरहवा विमानस्थल चलाउन निकै जोड गरेको छ । पोखरामा अन्तर्राष्ट्रिय उडानका हकमा हालसम्म संरचना तयार नभएको क्यानको भनाइ छ । 

दश घण्टा विमानस्थल बन्द भएपछि दैनिक एक/दुई उडान हुनेलाई सोही विमानस्थलबाट उडान गर्न दिइएको क्यानले जनाएको छ । तर, दैनिक चार उडान गर्नेले कम्तीमा ५० प्रतिशत र तीन उडान गर्नेले २५ प्रतिशत उडान गौतमबुद्धबाट गर्न क्यानले सर्कुलर समेत गरिसकेको छ ।

त्रिभुवन अन्तर्राष्ट्रिय विमानस्थलको फ्लाइट कटौती र भैरहवाका लागि प्याकेज आएसँगै पाँच वटा वायुसेवा कम्पनीले उडान सुरु गरेको क्यानका प्रवक्ता हंसराज पाण्डेले जानकारी दिए । “पाँचवटा एयरलाइन्स उडान गरिररहेका छन् । हामीले पनि उहाँहरूलाई आर्थिक रुपमा सहज होस् र यात्रुले पनि सहुलियत पाउन भनी छुट गरेका छौं । यसले गर्दा भैरहवा अब अरु विमान कम्पनीहरू पनि उडान गर्छन्,” उनले भने ।
 
भैरहवामा भारतीय वायुसेवा कम्पनीहरूले भने उडान भर्न चासो दिएका छैनन् । 

भारतीय वायुसेवा कम्पनीलाई पनि भैरहवा उडान गर्न क्यान लागिपरेको पाण्डेको भनाइ छ । “यो विस्तारै हुने विषय हो । इन्डियन क्यारियरसँग पनि उडान गर्न हामीले प्रयास गरिरहेका छौं,” उनी भन्छन्, “हाल सञ्चालन भइरहेका विमान कम्पनीले नाफा कमाए भन्ने बित्तिकै अन्य पनि आउँछन् ।”

दुई वर्षअघि उद्घाटन भएको गौतमबुद्ध विमानस्थल र पोखरा विमानस्थलबाट नियमित उडान हुन नसक्दा हालसम्म निरन्तर घाटा खाइरहेका छन् । चिनियाँ एक्जिम बैंकको ऋणमा निर्मित पोखरा अन्तर्राष्ट्रिय विमानस्थलबाट चार्टर अन्तर्राष्ट्रिय उडान हुन सकेको छैन ।