काठमाडौं । चलचित्र ‘ह्रस्व दीर्घ’को ट्रेलरमा ब्रह्मानन्दमको भाषालाई लिएर आलोचना भइरहेको बेला निर्माणपक्षले यसबारे प्रष्ट पारेको छ । ट्रेलरमा ब्रह्मानन्दमले नेपाली भाषामा बोलेका छन् । 

निर्मात्री तथा नायिका नीता ढुंगानाले ट्रेलरमा मात्रै ब्रह्मानन्दमले नेपाली बोलेको बताएकी छन् । चलचित्रमा टुटेफुटेको नेपाली र हिन्दी भाषा उनले प्रयोग गरेको प्रष्ट पारेकी छन् । ब्रह्मानन्दमले बनारसमा बसेर संस्कृत पढेर नेपाल आएको चरित्र निर्वाह गरेका नीताको भनाइ छ । 

ब्रह्मानन्दमले सेटमा स्टारडमको अभिमान नदेखाएको नीताले बताइन् । ब्रह्मानन्दमको सहज व्यवहारले काम गर्न निकै सहज भएको उल्लेख गरिन् । 

भोलि (शुक्रबार) बाट रिलिज हुने चलचित्रमा नीतासहित हरिहर अधिकारी, ब्रह्मानन्दम, अली, कवीर दुहान सिंह, प्रदीप रावत, सुनिल वर्मा र प्रशान्त ताम्राकार, सञ्चीता लुईंटेल, विपना थापा, सरोज खनाल, नरेन खड्का, गरिमा शर्मा, रवीन्द्र झा, आर्दश मिश्र, बुद्धि तामाङ र किरण केसीलगायत कलाकारको अभिनय छ ।

प्रतीक पौडेलको संवाद, निर्देशक चन्द्र पन्त र हरिहरको पटकथा तथा संवाद रहेको छ । चलचित्रलाई बलिउडका चर्चित सिनेमेटोग्राफर कवीरलालले खिचेका छन् । सिनेमाका कार्यकारी निर्माता धनन्जय गलानी हुन् ।

‘ह्रस्व दीर्घ’ नेपाली, तेलुगु र हिन्दी गरी तीन भाषामा रिलिज हुनेछ ।