काठमाडौं । विपक्षी दलको बैठकमा सहभागी भएका सत्ता गठबन्धनका नेताहरूले आफ्नो सभागिताबारे प्रस्टीकरण दिएका छन् । बुधबार बिहान बालुवाटारमा बसेको सत्ता गठबन्धनको बैठकमा लोकतान्त्रिक समाजवादी पार्टी (लोसपा)का अध्यक्ष महन्थ ठाकुर र नागरिक उन्मुक्ति पार्टीकी अध्यक्ष रञ्जिता चौधरीले प्रस्टीकरण दिएका हुन् । 

बैठकमा सहभागी एक नेताका अनुसार, ठाकुरले आफूलाई झुक्याएर बैठकमा बोलाएको बताएका छन् । रञ्जिताले भने आफू पुग्दा बैठक सकिएको बताएकी थिइन् ।

“बैठकमा उहाँहरूले प्रस्ट पार्नुभएको थियो । विपक्षीको बैठकमा प्रचण्डले झुक्याएर बोलाएको ठाकुरजीले बताउनुभयो,” ती नेता भन्छन्, “झुक्याएर बोलाउने, जालझेल गर्ने प्रचण्डको बानी नै हो भन्ने चर्चा पनि भयो । रञ्जिताजीले आफू पुग्दा बैठक नै सकिएको बताउनुभयो ।”

कात्तिक २ गते बानेश्वरमा विपक्षी दलको बैठक बसेको थियो । त्यस बैठकमा राजनीतिक दलसम्बन्धी अध्यादेश ल्याउन लागेको लगायतका विषयमा छलफल भएको थियो ।