काठमाडौं । प्रहरी निरीक्षक इन्स्पेक्टर बिनुकुमारी शाही नै जोडिएकी भैंसेपाटीको ‘हनि ट्रयाप’ घटनाको अनुसन्धान प्रतिवेदन जिल्ला सरकारी वलिक कार्यालय ललितपुर पुगेको छ । 

प्रहरीको केन्द्रीय अनुसन्धान ब्युरो (सीआईबी) ले अनुसन्धान गरेर अनुसन्धान प्रतिवेदन तीन दिनअघिनै सरकारी वकिल कार्यालय बुझाएको हो ।

तीन दिनदेखि सरकारी वकिल कार्यालयले सीआईबीको प्रतिवेदन अध्ययन गरेर मुद्दा दर्ताका लागि तयारी थालेको छ । 

सीआईबीले अनुसन्धान गर्नुअघि घटनाको अनुसन्धान जिल्ला प्रहरी परिसर ललितपुरले गरेको थियो ।

ललितपुरको अनुसन्धानले भैंसेपाटीको घटनामा पक्राउ परेका इटहरीका ताज इस्लाम र दर्शन पोखरेल समूहले विभिन्न ठाउँमासमेत ललितपुरका एक व्यवसायीलाई ‘हनि ट्रयाप’मा पारेर रकम असुल गरेको देखिएपछि थप अनुसन्धानका लागि अनुसन्धान प्रतिवेदन सीआईबी बुझाएको थियो ।

प्रतिवेदनसहित पक्राउ परेका आरोपीहरुलाईसमेत सीआईबीले छुट्टै अनुसन्धान गरेको थियो । 

इटहरीकै भिमादेवी थापा र सुस्मा विकसहितको समूहले ‘हनि ट्रयाप’मा पारेर व्यापारीसँग ३० लाख रुपैयाँ असुल गर्ने प्रयास गरेका थिए । जसमध्ये १० लाख रुपैयाँ भिमादेवीको खातामा ट्रान्सफरसमेत भएको थियो ।
बाँकी रकमको चेक भने प्रहरीले बरामद गरेको थियो ।

सोही घटनामा तत्कालीन भैंसेपाटी प्रभागकी प्रमुख इन्स्पेक्टर बिनुकुमारी शाहीको संलग्नता देखिएको थियो ।  उनीविरुद्धसमेत ललितपुर जिल्ला अदालतले पक्राउ पुर्जी जारी गरेको थियो । तर, उनलाई पक्राउ गर्न भने प्रहरीले सकेन ।

ललितपुर प्रहरीले पक्राउ गर्न नसकेको बिनु कुमारीलाई सीआईबीले समेत पक्राउ गर्न सकेन । यद्यपी पक्राउ परेका चारजना बाहेक फरार इन्स्पेक्टर शाही र दर्शन पोखरेललाई मुद्दा चलाउन सिफारिस गरेको छ ।

दर्शनसँग निकट सम्बन्ध देखिएका प्रहरी उपरीक्षक एसपी कमल थापाको हकमा भने सामान्य बयान कागजमात्रै भएको छ । पक्राउ परेका ताजको मोबाइल फेला नपर्दा र इन्स्पेक्टर शाहीको मोबाइलको समेत डिजिटल फरेन्सिक जाँच नहुँदा उनको कुनै संलग्नता नदेखिएको हो ।

शाहीसहित ६ जनालाई आपराधिक लाभ र संगठित अपराधको कसुरमा मुद्दा चलाइएको थियो । 

सोही मुद्दा चलाउनुपर्ने राय सीआईबीले दिएको छ । 

सीआईबी स्रोतले भने एसपी थापाको हकमा अनुसन्धान जारी रहेको र केही खुले कानुनी दायरामा ल्याइने बताए ।

स्रोतले भन्यो, ‘‘हामीले जोगाउन खोजेका हौँ । भैँसेपाटी घटनामा उनको भूमिका देखिँदैन । थप प्रमाण आए कानुनी दायरमा ल्याउछौँ अनुसन्धान सकिएको होइन ।’’ 

छ जना प्रतिवादीहरुमध्ये इन्स्पेक्टर शाही, दर्शन पोखरेल भने फरार सूचीमा छन् ।

भैंसेपाटी प्रहरी प्रमुख हुँदा शाहीकै गाडी चालक सहायक हवल्दार महेन्द्र हमाल, सुष्मा विक, ताज इस्लाम र भिमादेवी थापा भने प्रहरीको थुनामा छन् । ताज र सुस्मा असोज ७ गते नै पक्राउ परेका हुन् ।

सुनसरीको एक होटलमा वेटरको रूपमा काम गर्दै आएकी सुस्मालाई ‘हनि ट्रयाप’का लागि ताज र दर्शन पोखरेलको योजनाअनुसार व्यवसायीसँगको सम्पर्कमा पुगेकी थिइन् ।

पछि व्यवसायीबाट रकम असुल गर्न आफू अनकूल ठाउँको खोजी गरेका थिए । त्यसपछि उनीहरू प्रहरी प्रभाग भैंसेपाटी पुगेको प्रहरीको अनुसन्धानका क्रममा खुलेको छ ।

जिल्ला सरकारी वकिल कार्यालयका सहायक जिल्ला न्यायाधिवक्ता भरतकुमार मैनालीले भने सीआईबीको प्रतिवेदन अध्ययन भइरहेको बताए ।

“हामी सीआईबीको अनुसन्धान प्रतिवेदन अध्ययन गर्दैछौँ । आइतबार मुद्दा दर्ता गर्ने तयारी गरेका छौँ । एसपीको हकमा पनि अध्ययन भइरहेको छ । अध्ययनकै क्रममा रहेकाले बाँकी आइतबार मात्रै थाहा होला,” मैनालीले भने ।