काठमाडौं । समिर तामाङको ह्याट्रिकप्रेरित नेपालले एएफसी यू–२० एसियन कप छनोटको आफ्नो दोस्रो खेलमा घरेलु टोली चाइनिज ताइपेइविरुद्ध३–१ को सहज जित निकालेको छ ।

सोमबार न्यू ताइपेइस्थित फू जेन क्याथोलिक विश्वविद्यालयको मैदानमा सम्पन्न खेलमा नेपालको जितमा समिर नायक बने ।

खेलको ३२औँ मिनेटमा समिरले गोल गर्दै नेपाललाई अग्रता दिलाएका थिए । त्यसको तीन मिनेटपछि नै समिरले नै नेपालको अग्रता दोब्बर बनाए ।

पहिलो हाफको इन्जुरी समयमा घरेलु टिमका याङ चाओजिङ गोल गरेपछि पहिलो हाफ २–१ को अवस्थामा सकिएको थियो ।

खेलको निर्धारित समय सकिन ६ मिनेट बाँकी रहँदा समिरले ह्याट्रिक पूरा गरेपछि नेपालले सहज जित निकालेको हो । प्रतियोगितामा नेपालले खेलेको दुईमध्ये दुवै खेलमा गोल गरेका समिरको यो चौथो गोल हो । उनले यसअघि कम्बोडियाविरुद्ध पनि गोल गरेका थिए ।

यसअघि, नेपाल पहिलो खेलमा कम्बोडियासँग ४–१ ले पराजित भएको थियो । जितसँगै समूह ‘बी’ को नेपालले दुई खेलमा तीन अंक जोडेको छ । दुवै खेलमा पराजित चाइनिज ताइपेइ अंकविहीन छ ।