पोखरा । सूर्यदर्शन सहकारीको बचत अपचलन प्रकरणमा आइतबार नेपाल प्रहरीका पूर्वडीआईजी छविलाल जोशी पक्राउ परे । सूर्यदर्शनसहित आधादर्जन सहकारीबाट गोर्खा मिडिया नेटवर्कमा ६५ करोड रुपैयाँभन्दा बढी रकम गएको संसदीय छानबिन समितिको प्रतिवेदनमा उल्लेख छ ।

समितिले गरेको कारबाही सिफारिसको आधारमा जोशीलाई आइतबार नै काठमाडौंबाट पक्राउ गरेर पोखरा ल्याइएको थियो । सोमबार जिल्ला अदालत कास्कीले जोशीमाथि अनुसन्धान गर्न प्रहरीलाई पाँच दिनको समय दिएको छ । उनको सरकारी वकिलसमक्ष मंगलबारदेखि बयान लिइने छ ।

सूर्यदर्शन सहकारीका पीडितले गत माघ २२ गते तत्कालीन प्रबन्ध निर्देशक तथा पूर्वगृहमन्त्री राष्ट्रिय स्वतन्त्र पार्टी (रास्वपा)का सभापति रवि लामिछानेसहित १८ जनाको नाममा पूरक जाहेरी दिएका थिए । नामै किटान गरेर जाहेरी दिए पनि लामिछानेभन्दा अगाडि जोशी पक्राउ परे ।

व्यावसायिक साझेदार जोशी पक्राउ परेपछि लामिछानेलाई पनि प्रहरीले पक्राउ गर्न सक्ने संशयका साथ आइतबार रास्वपा कार्यालयमा कार्यकर्ताहरू भेला भए । भेलालाई सम्बोधन गर्दै लामिछानेले आफूलाई पक्राउ गर्न खोजिए प्रतिवाद गर्ने बताए ।

रास्वपाका शुभेच्छुक तथा आबद्ध सदस्यहरूले पनि सामाजिक सञ्जालमा लामिछानेविरुद्ध षड्यन्त्र भएको दाबीसहितका पोस्ट गरे । प्रतिवादस्वरूप विभिन्न ठाउँमा भेला हुन आग्रह गरे ।

पोखरामा सोमबार भएको रास्वपाको प्रदर्शन पनि प्रतिवादकै लागि थियो । अन्य स्थानभन्दा पोखरामा सहकारी प्रकरण चर्को पनि देखिन्छ । लामिछाने सहकारी प्रकरणमा जोडिएको घटना पनि पोखराबाटै सुरु भएको थियो ।

गत सालको मंसिरमा एक सार्वजनिक कार्यक्रममा लामिछानेमाथि खोया प्रहार भएको थियो । उक्त प्रकरणपछि लामिछानेको नाम सूर्यदर्शन सहकारीमा जोडिन थाल्यो ।

पोखरा महानगरले गरेको छानबिन प्रतिवेदनमा पनि उनी प्रबन्ध निर्देशक हुँदा सहकारीबाट रकम गएको खुलासा भयो । सूर्यदर्शन सहकारीका पीडितहरूले त्यसपछि माघ २२ मा पूरक जाहेरी नै दिए । लामिछाने त्यतिबेला रास्वपाका सभापतिमात्र थिए । तर, उनीमाथि पूरक जाहेरी परेको केही महिनापछि उनी गृहमन्त्री बने ।

गृहमन्त्री बनेपछि अनुसन्धानलाई दबाएको भन्दै सहकारी पीडित उनीप्रति झनै आक्रोशित बने । यतिसम्म कि केही दिन अगाडि पोखरामा पार्टीको प्रदेशस्तरीय कार्यक्रमलाई सम्बोधन गर्न आएका लामिछानेलाई पीडितहरूले कालोझन्डा देखाए । कार्यक्रमस्थल पुग्न प्रहरीको सहारा लिने अवस्था आयो ।

कार्यक्रमस्थल पुग्दा उनले ‘सहकारी ठग’को आरोप सुन्नुपर्‍यो । ढोका लगाएर गरिएको कार्यक्रममा उनकै पार्टीका सदस्यहरूले सहकारीको विषय प्रस्ट पार्नुपर्ने प्रश्न राखे ।

सहकारी प्रकरणमा प्रश्नैप्रश्नमा जेलिएका लामिछानेलाई पछिल्लो समय छानबिन समितिले प्रतिवेदन सार्वजनिक गर्दै कारबाही नै सिफारिस गर्‍यो ।

उनीसहित कारबाही सिफारिस भएका जोशी पक्राउ परेपछि सोमबार सहकारीपीडितले लामिछानेलाई पनि पक्राउ गर्नुपर्ने मागसहित प्रदर्शन गरे ।

अर्कोतिर लामिछानेलाई फसाउन खोजिएको भन्दै रास्वपाले पनि उनको पक्षमा प्रदर्शन गर्‍यो ।

जिल्ला प्रशासन कार्यालय कास्कीको गेटबाहिर एकैठाउँमा सहकारीपीडित र रास्वपा समर्थकहरू आमनेसामने भए ।

लामिछानेलाई पक्राउ गरिए कास्की नै ल्याइने भएकाले पोखराको सुरक्षा व्यवस्था पनि कडा पारिएको छ । सोमबार सहिदचोकदेखि पोखरा महानगरपालिकाको गेटबाहिरसम्म प्रहरी तैनाथ गरिएको थियो ।

प्रदर्शनका क्रममा केहीबेर स्थिति तनावजस्तो देखिए पनि दुवै पक्षले आ–आफ्नो प्रदर्शन गरे ।

जोशीलाई सोमबार जिल्ला अदालत कास्कीमा म्याद थप गर्न लैजानु अगाडि रास्वपाका कार्यकर्ताहरूले जिल्ला प्रशासन कार्यालय कास्कीको सामुन्ने धर्ना दिँदै विरोध गरेका थिए । उता, जोशीसहित लामिछाने र जीबी राईलाई समेत पक्राउ गर्नुपर्ने भन्दै अदालतबाहिर सूर्यदर्शन सहकारी पीडितहरू नाराबाजी गर्दै थिए ।

जसै सहकारी पीडितले लामिछानेको समर्थनमा प्रदर्शन भइरहेको चाल पाए, नाराबाजी गर्दै उनीहरू पनि जिल्ला प्रशासन कार्यालय अगाडि पुगे । रास्वपाका कार्यकर्ताहरूले लामिछानेलाई सरकारले षड्यन्त्र गरेर फसाउन लागेको भन्दै प्रदर्शन गरेका थिए ।

‘षड्यन्त्रकारी मुर्दावाद’, ‘भ्रमको खेती बन्द गर’, ‘फासिस्ट सरकार मुर्दावाद’, ‘सहकारी पीडितलाई न्याय दे’लगायत नारा लगाउँदै रास्वपाका समर्थकहरूले प्रदर्शन गरे । उनीहरूले मिडिया ट्रायल बन्द गर्न माग राखे ।

पार्टी सभापति लामिछानेलाई सरकारले फसाउन लागेकाले सांकेतिकरूपमा विरोध प्रदर्शन गरेको रास्वपा गण्डकीका सभापति एकराज न्यौपानेले बताए । सूर्यदर्शन सहकारी ठगीको अभियोगमा लामिछानेलाई पक्राउ गर्न सक्ने हल्ला सुनेकाले प्रदर्शन गरेको उनको भनाइ छ ।

उता, सहकारी पीडितहरूले चाहिँ ‘जनताको पार्टीको नामबाट ठग्ने होसियार’, ‘राष्ट्रिय पार्टी बनाएर ठगी गर्ने होसियार’लगायत नारा लगाए ।

सूर्यदर्शन सहकारी बचत पीडित संघर्ष समितिका संयोजक किरण श्रेष्ठले सहकारी ठगीमा कारबाही गर्न अवरोध गर्न लागेको देखेर प्रदर्शन गरेको बताए ।

कार्यकर्ता पीडितको पक्षमा नभई लामिछानेका लागि आएको पीडितहरूको भनाइ थियो । पीडितका लागि न्याय माग्दै गर्दा ठूलो रकम लामिछाने प्रबन्ध निर्देशक भएको बेलामै सहकारीबाट गोर्खा मिडियामा लगानी भएकाले त्यो रकम फिर्ता हुनुपर्ने आफ्नो माग रहेको पनि श्रेष्ठले बताए ।

अर्का सहकारी पीडित सानोकाजी बसौलाले लामिछानेलाई समातेपछि जीबी राईसमेत पक्राउ पर्ने र आफूहरूले बचत गरेको रकम फिर्ता पाउनेमा आशावादी रहेको सुनाए ।