काठमाडौं । हिमालयन चेस एकेडेमीको अयोजना प्याट्रिओटिक पन चेस च्याम्पियनसिप सम्पन्न भएको छ । संविधान दिवसको उपलक्ष्यमा आयोजित प्रतियोगितामा ४९ खेलाडी सहभागी थिए । प्रतियोगिता यू–७, यू–९, यू–११ र यू–१३ उमेर समूहमा आयोजना गरिएको थियो ।

यू–७ महिलातर्फ रुब्रेश्री चौलागाईं प्रथम भइन् । आहाना शाह दोस्रो र शुभानी पण्डित तेस्रो भइन् ।

गर्ल्स यू–९ मा अग्रता आचार्य ५ अंकसहित प्रथम, अमिषा कोइराला चार अंकका साथ दोस्रो तथा प्रियंशा प्रधान तीन अंकसहित शीर्ष तीनमा रहिन् ।

गर्ल्स यू–११ विधामा निहाना श्रेष्ठ २ अंकसहित प्रथम, नयुमा मगर दोस्रो र डोमा तामाङ तेस्रो भए ।

यू–१३ गर्ल्स डिभिजनमा एन्जल महर्जनले उपाधि जितिन् । क्रिस्टी रिजाल उपविजेता भइन् ।

ब्वाइजको यू–७ समूहमा रातो बंगला स्कुलका शुभाङ्ग प्रधान र साङ्ग्रिला पब्लिक स्कुलका सयश बस्नेत दुवैले साढे चार अंक जोडे । तर, टाइब्रेकर नियमका कारण शुभांग विजयी भए । अवन महर्जन तीन अंकसहित तेस्रो भए ।

ब्वाइज यू–९ तर्फ प्रकृति बाटिका स्कुलका शौमिल चित्रकारले ४ अंकका साथ अग्रता बनाएका थिए । एल्विक अधिकारीले पनि ४ अंक बनाए पनि टाइब्रेकको आधारमा दोस्रो स्थानमा रहे । उत्कर्ष गिरी साढे ३ अंकका साथ तेस्रो भए ।

प्रसित खनालले केटाको यू–११ मा उत्कृष्ट प्रदर्शन गर्दै पाँच अंकका साथ उत्कृष्ट प्रदर्शन गरे । सात्विकमान तुलाधर ४ अंकका साथ दोस्रो स्थानमा रहे भने लियोन महर्जनले पनि ४ अंक जोडेर तेस्रो स्थानमा रहे ।

ब्वाइज यू–१३ मा उपाधि प्रविर केसीले जितेका छन् । निश्चल रिमाल र तपस तामाङ दुवैले साढे तीन अंक जोडे भने निश्चलले टाइब्रेकबाट दोस्रो स्थान हासिल गरे ।

प्रत्येक विधाका उत्कृष्ट तीन विजेतालाई प्रमुख अतिथि अल एन्जलस नेपालकी अध्यक्ष अमिषा श्रेष्ठ र हिमालयन चेस एकेडेमीकी संस्थापक मोनालिशा खाम्बुले मेडल, ईप्रमाणपत्र र ट्रफी प्रदान गरेका थिए ।