काठमाडौं । राष्ट्रिय महिला लिग–२०२४ मा विभागीय टोली त्रिभुवन आर्मी क्बलले कोसी प्रदेशविरुद्ध ५–० को फराकिलो जित निकालेको छ ।

मंगलबार सातदोबाटोस्थित एन्फा मुख्यालयमा भएको खेलमा आर्मीलाई जित दिलाउन विमला चौधरी र अनिता लम्जेलले समान दुई गोल गरे । आर्मीबाट अर्को एक गोल हिमा चौधरीले थपिन् ।

खेलको आठौँ मिनेटमा विमलाले गोल गर्दै आर्मीलाई अग्रता दिलाएकी थिइन् । त्यसको दुई मिनेटपछि विमलाले नै विभागीय टोलीको अग्रता दोब्बर बनाइन् ।

२१औँ मिनेटमा हिमाले आर्मीको अग्रतालाई ३–० मा पुर्‍याइन् । ३८औँ मनेटमा अनिताले पहिलो गोल गर्दा आर्मीले पहिलो हाफमा ४–० को अग्रता बनाएको थियो । ६०औँ मिनेटमा अनिताले दोस्रो गोल गरेपछि आर्मीले ५–० को जित पक्का गर्‍यो । 

जितसँगै ६ खेलबाट १३ अंक जोडेको आर्मी तालिकाको दोस्रो स्थानमा उक्लिएको छ । समान खेलबाट १० अंक जोडेको कोसी चौथो स्थानमा यथावत् छ ।

यसअघि, आजै भएको पहिलो खेलमा एपीएफले संकटा क्लबविरुद्ध ३–० को जित निकालेको थियो ।