काठमाडौं । सत्तासाझेदार दल नेपाली कांग्रेसका राष्ट्रियसभा सदस्य किरणबाबु श्रेष्ठले १०० दिन पनि नपुग्दै सरकारको विरोध नगर्न प्रमुख प्रतिपक्ष दल नेकपा (माओवादी केन्द्र)लाई आग्रह गरेका छन् ।

प्रजातान्त्रिक मुलुकमा १०० दिन पनि नपुग्दै सरकारको विरोध गर्नु, उसको काममा अवरोधको प्रयास गर्नुलाई उचित मान्न नसकिने उनले बताए ।

आइतबार राष्ट्रियसभा बैठकमा विशेष समय लिएर सांसद श्रेष्ठले माओवादी केन्द्रका अध्यक्ष पुष्पकमल दाहाल ‘प्रचण्ड’ले सत्ताबाट बाहिरिनेबित्तिकै जथाभावी बोल्न थालेको भन्दै आपत्ति जनाए ।

“...गठबन्धनको सरकार बनेको १०० दिन पनि पुगेको छैन । १०० दिन नपुग्दै यहाँ विभिन्न किसिमको विरोध, बाधा, अवरोधहरू सिर्जना गर्न थालिएको छ । यो प्रजातन्त्रका लागि राम्रो सन्देश पनि होइन,” उनले भने ।

प्रचण्डले मुलुक बंगलादेश र श्रीलंका हुने चेतावनी दिएर जनतामा भ्रम छर्ने प्रयास गरेको उनले उल्लेख गरे । अभिव्यक्ति स्वतन्त्रताका नाममा जथाभावी बोल्दै नहिँड्न उनले चेतावनी दिए ।

“हिजोसम्म सत्तामा छौँ । हिजोसम्म सरकारमा छौँ । सरकारबाट निस्कन पाएको छैन, बंगलादेश र श्रीलंका भन्छौँ,” उनले भने, “अनि, त्यसको हिजोसम्मको दोषको भागी लिने कि नलिने ? यस्ता अभिव्यक्तिहरूले नेपाली जनतामा भ्रम सिर्जना गर्छ । त्यो भ्रम सिर्जना गर्ने काम हामी नगरौँ ।”

उनले थपे, “प्रजातन्त्र भनेको अभिव्यक्ति स्वतन्त्रता हो, स्वच्छन्दता होइन । जे मन लाग्यो त्यही बोल्ने किसिमको स्वच्छन्दता होइन । त्यस विषयमा पनि हामी सबै पक्ष जिम्मेवार हुनुपर्छ भन्ने मलाई लाग्छ ।”

सांसद श्रेष्ठले आफू सरकारमा हुँदा भएको गल्तीको जिम्मेवारी प्रचण्डले पनि लिनुपर्नेमा जोड दिए । न्युज एजेन्सी नेपाल