काठमाडौं । चोटका कारण दुई महिना मैदानबाट बाहिरिएका अर्जेन्टिनी कप्तान लियोनल मेसीले मेजर लिग सकर (एमएलएस)मा सानदार पुनरागमन गरेका छन् । 

आइतबार दुई महिनापछि मैदान उत्रिएका मेसीले इन्टर मियामीलाई जित दिलाउन दुई गोल गरे । मेसीप्रेरित मियामीले लिगमा फिलाडेल्फियाविरुद्ध ३–१ को पुनरागमन जित निकालेको हो । 

खेलको दोस्रो मिनेटमा मिकाएल उह्रेले गोल गर्दै पाहुना टिम फिलाडेल्फियालाई अग्रतामा राखेका थिए । तर, पहिलो रोजाइमै मैदान उत्रिएका मेसीले २६औँ मिनेटमा गोल गर्दै मियामीलाई खेलमा फर्काए । त्यसको चार मिनेटपछि मेसीले नै दोस्रो गोल गरेपछि मियामीले २–१ को अग्रता बनायो । 

यस्तै, इन्जुरी समयमा लुइस स्वारेजले गोल गरेपछि मियामीले ३–१ को जित पक्का गरेको हो । जितसँगै शीर्ष स्थानमा आसिन मियामीले १० अंकको अग्रता बनाएको छ । मियामीले २८ खेलबाट ६२ अंक जोडेको छ । समान खेलबाट ५२ अंक जोडेको सिनसिनाटी तालिकाको दोस्रो स्थानमा छ । २८ खेलबाट ३० अंक जोडेको फिलाडेल्फिया भने तालिकाको ११औँ स्थानमा छ ।