काठमाडौं । नेपाली कांग्रेसका राष्ट्रियसभा सदस्य आनन्दप्रसाद ढुंगानाले पूर्वप्रधानमन्त्री एवं नेकपा (माओवादी केन्द्र)का अध्यक्ष पुष्पकमल दाहाल ‘प्रचण्ड’ले संसद्‌मा दिएको अभिव्यक्तिप्रति आपत्ति जनाएका छन् । मंगलबार राष्ट्रियसभा बैठकमा उनले यस्तो आपत्ति जनाएका हुन् ।

उनले पूर्वप्रधानमन्त्रीजस्तो व्यक्तिले देश श्रीलंका र बंगलादेश बन्छ भन्दै अभिव्यक्ति दिन नमिल्ने बताए । आफू सत्तामा रहुन्जेल सही र अर्को व्यक्ति सरकारमा जानेबित्तिकै गलत नहुने उनले उल्लेख गरे ।

उनले पदका निम्ति यताउति गरिरहने अस्थिरताका कारण देश अप्ठ्यारोमा परेको र आवश्यकताले वर्तमान गठबन्धन बनेको बताए । प्रचण्डलाई मार्सी चामलको भात खाएर गरिएको गठबन्धन बिर्सिनुभयो ? भन्दै उनले प्रश्न गरे ।

“...हामीले गठबन्धन गर्दा रातमा कहाँ गर्‍यो रे ! १२ बजे कहाँ पुग्यो रे ! ए, मार्सी चामलको भात बिर्सिनुभयो ? मार्सी चामलको खाएको भात बिर्सिनुभयो तपाईंहरूले ? त्यसैले कसैले गाली गर्दा आफ्नो अनुहार पनि ऐनामा हेर्नुपर्छ,” उनले भने ।

भ्रष्टाचार र सुशासनका कुरा गर्ने गरिएको भन्दै उनले सुनकाण्ड कहाँ गयो ? कतिजना जेलमा छन् ? भन्दै प्रश्न गरे । स्थिरताका निम्ति वर्तमान सरकार आवश्यक रहेको उनको भनाइ थियो । न्युज एजेन्सी नेपाल