काठमाडौं । अख्तियार दुरुपयोग अनुसन्धान आयोगले दार्चुलाको शैल्यशिखर नगरपालिकाका कृषि प्राविधिक अधिकृत मोहनसिंह धामी र कृषि नायव प्राविधिक सहायक अशोकसिंह धामीविरुद्ध भ्रष्टाचार मुद्दा दायर गरेको छ ।

उनीहरूले सेवाग्राहीसँग नौ लाख १२ हजार रुपैयाँ घुस लिएको दाबी गर्दै अख्तियारले आइतबार विशेष अदालत काठमाडौंमा मुद्दा दायर गरेको हो । अख्तियारले उनीहरूसँग नौ लाख १२ हजार रुपैयाँ बिगो दाबी गरेको छ ।

कृषि प्राविधिक अधिकृत मोहनसिंह र कृषि नायव प्राविधिक सहायक अशोकसिंहले कृषि समूहको बिल भुक्तानी गर्दा कमिसनबापत सेवाग्राहीसँग घुस मागेको उजुरी परेपछि अख्तियारले उनीहरूमाथि निगरानी बढाएको थियो ।

यसैक्रममा केही दिनअघि कञ्चनपुरस्थित अख्तियारको कार्यालयबाट गएको टोलीले उनीहरूलाई सेवाग्राहीसँग नगद चार लाख १२ हजार रुपैयाँ र दुई लाख ५० हजार रुपैयाँको दुईवटा बैंक चेक लिइसकेको अवस्थामा नियन्त्रणमा लिएको थियो ।