गाजापट्टी । गाजाको नागरिक सुरक्षा विभागले शनिबार बिहान इजरायली हवाई आक्रमणमा नौ बालबालिका र तीन महिलासहित प्यालेस्टाइनी परिवारका १५ सदस्यको मृत्यु भएको जनाएको छ । मध्य गाजाको अल–जावैदास्थित अज्लाह परिवारको घरमा आक्रमण गरिएको नागरिक सुरक्षा विभागका प्रवक्ता महमुद बस्सलले बताए ।

इजरायली सेनाले यो घटनाबारे कुनै टिप्पणी गरेको छैन । “अल–जावैदाको अज्लाह परिवारको घर र गोदाममा भएको इजरायली आक्रमणबाट १५ जनाको मृत्यु भएको छ,” बस्सलले भने ।

उद्धारकर्ताले आक्रमणबाट क्षतिग्रस्त घरको भग्नावशेषबाट शव निकाल्दा अहमद अबु अल–घौलले भने, “तीनवटा रकेटहरू सिधै घरमा खसेको थियो । भित्र बालबालिका र महिलाहरू थिए, उनीहरूको के दोष थियो ?”

इजरायल र हमासबीच १० महिनाभन्दा बढी समयदेखि चलिरहेको युद्धले गाजाको विशाल भूभागलाई भग्नावशेष बनाएको छ । रासस/एएफपी