ढाका । बंगलादेशमा विद्यार्थी आन्दोलन चर्किएपछि प्रधानमन्त्री शेख हसिनाले राजीनामा दिएकी छन् । उनले देश पनि छोडेकी छन् । देश छोड्दा साथमा बहिनी शेख रेहाना पनि छन् । तर, कहाँ गइन समाचारमा खुलाइएको छैन ।
उनले आफू बस्ने दरबार छोडेको स्रोतलाई उल्लेख गर्दै एएफपीले जनाएको छ । उनको राजीनामाको माग गर्दै विद्यार्थीहरुले आइतबारबाट सुरु गरेको आन्दोलनका क्रममा एकै दिन करिब १०० जनाको मृत्यु भएको थियो ।

बंगलादेशका प्रधानमन्त्रीको निवासलाई गणभवन भनिन्छ । समाचारमा प्यालेस छोडेको बताइए पनि कुन प्यालेस भनिएको छैन । यसैबीच प्रधानसेनापतिले देशका नाममा आज दिउँसो ३ बजे सम्बोधन गर्न लागेको समेत बताइएको छ । 

हसिना अधिनायकवादतर्फ अघि बढेकै हुन् ?

सुरक्षित स्थानमा जानका लागि उनले दरबार छोडेको स्रोतलाई उद्धृत गर्दै जनाइएको छ । आइतबारको घटनापछि बंगलादेशमा कर्फयु लागेको छ भने तीन दिन सार्वजनिक विदा दिइएको छ । इन्टरनेट पनि बन्द गरिएको छ ।

हसिनाका छोराले उनको शासनमा हुन सक्ने कुनै पनि टेकओभरलाई रोक्न सुरक्षा फौजलाई आग्रह गरेका छन् । प्रधानमन्त्री हसिनाले एक वक्तव्य रेकर्ड गराउन चाहेको तर त्यो पनि नपाएको समेत स्रोतले बताएको एएफपीको समाचारमा उल्लेख छ ।

वाकरले शनिबार सैनिक अफिसरहरुलाई सेना सधै जनताको साथमा रहेको बताएको एक औपचारिक वक्तव्यमा जनाइएको थियो । सेनाले जनवरी २००७मा पनि व्यापक राजनीतिक तनावपछि सैनिक समर्थित केयरटेकर सरकार बनाइएको थियो ।