काठमाडौं । रोमाञ्चक खेलमा घरेलु टिम नेपाललाई ३–२ को सेटमा निराश बनाउँदै इरानले काभा महिला नेसन्स लिगको लिग चरण टुंग्यायो ।

आइतबार त्रिपुरेश्वरस्थित राष्ट्रिय खेलकुद परिषद् (राखेप) परिसरमा भएको यस खेलले घरेलु समर्थकलाई रोमाञ्च, उत्साह र तनाव गजबैले दियो । शनिबार भारतविरुद्ध ऐतिहासिक जित निकालेर सनसनी मच्चाएको नेपालले आइतबार भने त्यो लयअनुसारको प्रदर्शन देखाउन सकेन ।

सानो कभर्ड हलमा भरिभराउ दर्शकमाझ नेपाललाई इरानले पहिलो सेटमा २५–१६ ले हरायो ।

पहिलो सेटमा नेपाली टोली डिफेन्समा निकै फितलो देखियो । पहिलो सेटमा नेपालविरुद्ध पूरा हाबी बनेको इरानले नै सेटको पहिलो अंक लिएको थियो । पहिलो सेटमा इरानले सुरुआतमै ३–० को अग्रता बनाउँदा नेपालका प्रशिक्षक जगदीश भट्टले पहिलो टाइमआउट लिँदै इरानको यो लय ब्रेक गर्ने प्रयास गरे । तर, प्रशिक्षक भट्ट यो रणनीतिमा सफल बन्न सकेनन् । पुनः इरानले लगातार अंक खोसेपछि भट्टले ५–१२ को स्थितिमा दोस्रोपटक टाइमआउट लिएका थिए ।

पहिलो सेटमा इरानले एकपटक मात्र टाइमआउटको प्रयोग गर्‍यो । इरानले नेपालविरुद्ध १९–११ को स्थितिमा टाइमआउट लिएको थियो ।

पहिलो सेटमा नेपाल तीनपटक सर्भिसमा चुक्यो । नेपालकी सुमित्रा रेग्मीले दुई र निरुता ठगुन्नाले समान एक अंक सर्भिसबाट इरानलाई दिए । पहिलो सेटमा इरानबाट भएको सर्भिस गल्तीमा नेपालले पनि तीन अंक नै पाएको थियो ।

पहिलो सेटमा जसरी पराजित भएको थियो, नेपालले दोस्रो सेटमा इरानलाई त्यसैगरी पराजित गर्‍यो । यस सेटमा नेपालले इरानविरुद्ध २५–१६ कै स्कोरमा जित निकाल्यो । दोस्रो सेटको सुरुआती अंक जोडेको नेपालले लगातार इरानमाथि दबाब बनाउन सफल रह्यो । 

सुरुआतमै नेपालले ४–० को अग्रता बनाउँदा इरानी प्रशिक्षकले पहिलो टाइमआउट लिँदै नेपालको लय ब्रेक गर्ने प्रयास गरेका थिए । यो सेटको सुरुआतमा नेपालले ७ अंक जोड्दासम्म इरानले अंकको खाता खोल्न सकेको थिएन ।

पहिलो सेटको तुलनामा यो सेटमा सर्भिसमा सुधारिएको प्रदर्शन गरेको नेपालले १५–८ को स्कोर हुँदा पहिलो टाइमआउटको उपयोग गरेको थियो । यसपछि दुवै टिमले समान तीन अंक जोड्दै स्कोर नेपालले १८–११ को स्थितिमा राख्दा इरानी प्रशिक्षकले दोस्रोपटक टाइमआउट लिएका थिए ।   दोस्रो सेटमा निरुता र सरस्वती चौधरीले समान एक गरी दुई अंक इरानले नेपाली टिमको सर्भिस गल्तिबाट पाएको थियो । दोस्रो सेटमा इरानबाट पनि नेपालले दुई अंक नै सर्भिस गल्तीबाट पाएको थियो ।

तेस्रो सेटमा पुनः इरानले नेपालविरुद्ध २५–२३ को जित निकाल्दै खेलमा २–१ को अग्रता बनायो । 

यस सेटको पहिलो अंक नेपालले जोडेको थियो । नेपालले ७–५ को स्थितिमा तेस्रो सेटको पहिलो टाइमआउट लियो । सुरुआतमा इरानविरुद्ध लगातार अंक खोस्न सफल रहे पनि अन्त्यमा पाहुना टिम नेपालविरुद्ध हाबी रह्यो । 

तेस्रो सेटमा ८–१० ले पछि पर्दा नेपालले लगातार ६ अंक जोड्दै स्कोर १४–१० मा ल्याएको थियो । तर, यसपछि इरानले पुनः पाँच अंक जोड्दै स्कोर १५–१४ मा ल्याएपछि नेपालका प्रशिक्षकले दोस्रो पटक टाइमआउट प्रयोग गरे ।

स्कोर २१–२१ हुँदा इरानी टिमले टाइमआउट लियो । यो टाइमआउटपछि नेपालले दुई अंक जोड्दा इरानले चार अंक जोड्दै सेट आफ्नो पक्षमा राखेको थियो ।

तेस्रो सेटमा नेपालले सर्भिस गल्तीबाट एक अंक इरानलाई दियो । नेपालकी सुमित्रा तेस्रो सेटमा सर्भिस ‘मिस्टेक’ गर्ने एकमात्र खेलाडी बनिन् । यो सेटमा इरानबाट नेपालले भने सर्भिस ‘मिस्टेक’बाट चार अंक पाएको थियो ।

चौथो सेट नेपालले २५–१५ ले सहजै जितेपछि खेल पाँचौँ सेटसम्म लम्बिएको हो । यो सेटमा दुई पटक टाइमआउट लिँदै नेपालको लय तोड्ने रणनीतिमा इरान सफल बन्न सकेन । इरानले स्कोर १–३ हुँदा पहिलोपटक र ११–१७ हुँदा दोस्रोपटक टाइमआउट लिएको थियो ।

चौथो सेटमा इरानी टिमको सर्भिस खेलभरकै सबैभन्दा धेरै रह्यो । यो सेटमा इरानबाट नेपालले सर्भिस ‘मिस्टेक’ हुँदा पाँच अंक पाएको थियो । सोही गल्तीबाट नेपालले भने एक अंकमात्र इरानी टिमलाई दियो । साफिया पुन मगर चौथो सेटमा सर्भिस ‘मिस्टेक’ गर्ने नेपालकी एकमात्र सर्भर बनिन् ।

सबैभन्दा रोमाञ्चक बनेको पाँचौँ सेटको पहिलो अंक पनि इरानले नै जोड्यो । सुरुआतमा नेपालले ४–२ को अग्रता बनाए पनि यसपछि इरानले लगातार तीन अंक जोड्दै स्कोर ५–४ मा पुर्‍याएपछि नेपालले पहिलोपटक टाइमआउट लियो । 

यसपछि स्कोर इरानले ७–५ को स्थितिमा राख्दा नेपाली टिमका प्रशिक्षक भट्टले दोस्रो पटक टाइमआउटको प्रयोग गरे । यसपछि नेपालले यो सेटभर इरानी टिमविरुद्ध अग्रता बनाउन सकेन ।

अन्तिम सेटमा १२–९ ले अघि रहँदा इरानले पहिलो टाइमआउट लियो । यसपछि नेपालले पुनः लगातार दुई अंक जोड्दै स्कोर १२–११ को स्थितिमा ल्याएपछि इरानी टिमले दोस्रो पटक टाइमआउट लिएको थियो ।

स्कोर इरानतर्फ १२–११ हुँदा कप्तान अरूणा शाहीबाट सर्भिसमा भएको ‘मिस्टेक’ नेपाली टिमलाई सबैभन्दा महँगो बन्यो । यो सेटमा इरानी टिम १५–१३ ले विजयी भएपछि प्रतियोगितामा नेपालको अपराजित यात्रामा पूर्णविराम लाग्यो ।

खेलभर नेपालले सर्भिस ‘मिस्टेक’बाट नौ अंक गुमायो । जसमा सुमित्रा सबैभन्दा सर्भिस ‘मिस्टेक’ गर्ने खेलाडी रहिन् । उनले चार अंक सर्भिसबाट गुमाइन् । यस्तै, निरुताले दुई अंक सर्भिसबाट गुमाइन् । कप्तान अरूणा, सरस्वती र सोफियाले समान एक अंक सर्भिसबाट गुमाए ।

“रणनीतिअनुसार खेललाई अघि लैजान सकिएन । पहिलो सेटमा रिसिभ मिस्टेक हुँदा टिमलाई लयमा फर्किनै गाह्रो भयो । सेकेन्ड सेटमा राम्रो कमब्याक गरेका थियौँ । तर, त्यसलाई निरन्तरता दिन नसक्दा हार्न पुग्यौँ,” खेलपछि नेपाली टिमकी कप्तान अरूणाको प्रतिक्रिया थियो, “आजको हार नतिजाको कारण सेमिफाइनलमा सम्भवतः हामी इरानसँग नै खेल्नेछौँ होला । त्यस खेलमा भने आज देखिएका कमजोरी सुधारेर आउने छौँ ।”

नेपालले अघिल्लो दिनमात्रै भारतलाई ३–२ को सेटमा हराएर इतिहास बनाएको थियो । नेपाली भलिबलको इतिहासमा यो नै भारतविरुद्धको पहिलो र अहिलेसम्मको एकमात्र जित हो ।

नेपाली टिमका प्रशिक्षक भट्टले भने भारतसँग पाँच सेटको खेल हुँदा खेलाडीमाथि शारीरिक दबाब थपिएको बताए ।

“भारतसँग पाँच सेटमा खेल जित्दा आजको खेलका लागि खेलाडीमा ओभरलोड भयो । भारतलाई जितेपछि लिग चरणको च्याम्पियन बन्ने लक्ष्य थियो । हाम्रो यो पहिलो हार हो । यसैकारण लिगको म्याच हाम्रो लागि खासै महत्त्व राख्दैन । अब सेमिफाइनलको तयारी गर्न अघि बढ्छौँ,” खेलपछि प्रशिक्षक भट्टले भने, “डिफेन्समा कमजोर नै भयौँ । भनेको ठाउँमा सर्भिस पनि हान्न सकेनौँ । तेस्रो सेटमा कमब्याक गर्न नसक्नु नै हाम्रो हार भयो ।”

नेपालमाथि जित निकालेसँगै चार खेलबाट सात अंक जोडेको इरान तालिकाको शीर्ष स्थानमा उक्लिएको छ । तीन खेलबाट ६  अंक जोडेको नेपाल तालिकाको तेस्रो स्थानमा छ ।

तालिकाको दोस्रो स्थानमा भारत छ । भारतले तीन खेलबाट सात अंक जोडेको छ । समान खेलबाट चार अंक जोडेको श्रीलंका तालिकाको चौथो स्थानमा छ ।

पुछारको माल्दिभ्स प्रतियोगितामा अझैसम्म जितविहीन छ । नेपालले अब भोलि (सोमबार) लिग चरणको अन्तिम खेलमा माल्दिभ्सविरुद्ध खेल्ने तालिका छ । यस्तै, अन्तिम खेलमा भारतले श्रीलंकाविरुद्ध खेल्ने तालिका छ ।

तस्बिरहरू : हरिशजंग क्षेत्री/बाह्रखरी