![निर्देशक मिन भाम भन्छन्– ‘शाम्बाला’ आजीवन युट्युबमा आउँदैन](https://12khari.top/uploads/posts/Sambala-1721994739.jpg)
काठमाडौं । निर्देशक मीन भामले आफ्नो चलचित्र ‘शाम्बाला’ आजीवन युट्युबमा रिलिज नगर्ने घोषणा गरेका छन् ।
आफ्नो पहिलो चलचित्र ‘कालोपोथी’ पनि युट्युबमा नरहेको र ‘शाम्बाला पनि युट्युबमा नआउने उनको भनाइ छ ।
“सिनेमा युट्युबका लागि भनेर बनाएकै नहुने भएकाले म युट्युबमा सिनेमा राख्दिनँ । मेरो पहिलो चलचित्र पनि युट्युबमा आएन,” मीन भन्छन्, “शाम्बाला पनि आउँदैन । ओटीटीमा त सानो स्क्रिनमा हेर्नै पर्ने होला । तर म त भन्छु, चलचित्र सकेसम्म हलमै हेरौँ ।”
युट्युबबाट केही पैसा आउने भए पनि आफूले त्यसमा चलचित्र कहिल्यै र कुनै पनि नराख्ने उनको भनाइ छ । “सबैको आ–आफ्नै विचार होला । पैसा आउने पनि होला । तर म युट्युबमा आजीवन मेरो सिनेमा राख्दिनँ,” उनी स्पष्ट पार्छन् ।
करिब १५ करोड लगानीमा बनेको ‘शाम्बाला’ यही भदौ २८ गतेबाट नेपालमा रिलिज हुँदै छ ।
‘शाम्बाला’ बर्लिन फिल्म फेस्टिभलको अन्तर्राष्ट्रिय प्रतिस्पर्धाको विधामा छनोट भएको थियो । उक्त फेस्टिभलको यो विधामा छनोट हुने ‘शाम्बाला’ पहिलो नेपाली फिचर फिल्म हो ।
यस्तै ‘शाम्बाला’ स्विट्जरल्यान्डको फिल्म फेस्टिभल लोकार्नोको ७७औँ संस्करणमा छनोट भएको छ । पियाजा ग्राण्डे विधामा चलचित्र छनोट भएको हो । यीबाहेक विश्वका थुप्रै फेस्टिभलमा यो चलचित्र छनोट भइसकेको छ ।
सुनी फिल्म्स प्रालिको ब्यानरमा निर्माण भएको ‘शाम्बाला’मा थिन्ले ल्हामो, सोनम तोप्द्न, तेन्जिङ डल्हालगायतको मुख्य भूमिका छ ।
उच्च हिमाली गाउँकी एक गर्भवती महिलालाई श्रीमानले छोडेपछि आफ्ना देवरलाई लिएर उनको खोजीमा हिँडेकी महिलाको कथा यो चलचित्रले पेस गर्छ । चलचित्रको कथा मिन भाम र अविनाशविक्रम शाहले लेखेका हुन् ।
निर्देशक मिनले हालसम्म विश्वका २९ देशमा हल रिलिजको टुंगो लागिसकेको छ ।
“हाम्रो सेल्स एजेन्ट जो हो उसका अनुसार ४० देशको राइट्स बिक्री भइसकेको छ,” उनले भने, “नेट्फिल्क्ससँग पनि संवाद भइरहेको छ । तर, सबैतिर रिलिज भइसकेपछि मात्र नेट्फिल्क्समा जाने हाम्रो लक्ष्य हो । हेरौँ कस्तो हुन्छ ।”