विराटनगर । कोसी प्रदेशको लोकसेवा आयोगको अध्यक्षमा पूर्वसचिव महेन्द्रप्रसाद गुरागाईं सिफारिस भएका छन् ।

आइतबार मुख्यमन्त्री तथा मन्त्रिपरिषद्को कार्यालयमा मुख्यमन्त्री हिक्मतकुमार कार्कीको अध्यक्षता बसेको सिफारिस समितिको बैठकले उनलाई नियुक्त गर्न प्रदेश प्रमुखसमक्ष सिफारिस गर्ने निर्णय गरेको हो ।

लामो समय निजामती सेवामा काम गरेका गुरागाईंसँग लोकसेवा आयोगमा काम गरेको अनुभव छ । उनले दुई वर्षअघि सेवाबाट अवकाश पाएका थिए ।

सिफारिस समितिमा मुख्यमन्त्री, प्रदेश सभाका सभामुख र विपक्षी दलका नेता रहने कानुनी व्यवस्था छ । प्रदेश लोकसेवा आयोग ऐन, २०७६ अनुसार आयोगको अध्यक्षको समयावधि ६ वर्षको हुन्छ ।

यसअघिका अध्यक्ष उत्तम भट्टराई उमेर हदका कारण अवकाशमा गएका थिए ।