काठमाडौं । राष्ट्रिय स्वतन्त्र पार्टी (रास्वपा)को केन्द्रीय कमिटी बैठकमा महामन्त्री मुकुल ढकालको प्रतिवेदनमाथि छलफल जारी छ । सह–प्रवक्ता मनिष झाका अनुसार बैठकमा एकजना केन्द्रीय सदस्यलाई बोल्नका लागि ७ मिनेट समय दिइएको छ ।

बैठकको सुरुमा नै सभापति रवि लामिछानेले महामन्त्रीको प्रतिवेदेन लाइभ गर्ने प्रस्ताव राखेका थिए । “सुरुमा पार्टी सभापतिले महामन्त्रीको अनुरोधअनुसार लाइभ गर्ने प्रस्ताव गर्नुभयो । तर, प्रतिवेदन सभापतिबाहेक कसैले हेरेका थिएनौँ,” उनले भने ।
 
तर, केन्द्रीय सदस्यहरुले पहिला केन्द्रीय समितिमा वाचन गर्ने र सबैले आफ्ना धारणा राखेपछि सार्वजनिक गर्नुपर्ने अडान लिएको उनले बताए । महामन्त्रीले लाइभ नगरे स्वतन्त्रताको हनन् भएको भन्दै  मुखमा कालो टेप लगाएर बसेको सह–प्रवक्ता झाले जानकारी दिए । 

“महामन्त्रीज्यूले लाइभ गरिदैन भने मेरो व्यक्तिगत स्वतन्त्रताको हनन् हो । त्यसैले गर्दा मुखमा कालो टेप लगाएर बस्छु भन्नुभयो । र, कालो टेप लगाउनुभयो,” उनले भने ।
 
महामन्त्रीले नबोलेपछि महामन्त्री ढकालको प्रतिवेदन सह–महामन्त्री कविन्द्र बुर्लाकोटीले वाचन गरेको उनले जानकारी दिए । 

झाका अनुुसार ३३ पेजको प्रतिवेदन वाचन गर्न झण्डै डेढ घण्टा लागेको थियो । केन्द्रीय समितिमा महामन्त्रीको प्रतिवेदनमाथि छलफलका लागि अझै ३–४ घण्टा लाग्ने झाले बताए ।