क्यालिफोर्निया । अमेरिकाको राष्ट्रपति निर्वाचनमा डेमोक्रेटिक पार्टीबाट अहिले ग्याभिन क्रिस्टोफर न्युसमको नाम चर्चामा छ । राष्ट्रपतिको उमेदवारहरूबीच बिहीबारको डिबेटमा राष्ट्रपति जो बाइडेन कमजोर भएपछि उनको विकल्पमा भन्दै ग्याभिनको नाम चर्चामा आएको हो । 

यद्यपि, उनी राष्ट्रपतिका लागि बाइडेनले आफ्नो उमेदवारी छोडेको अवस्थामा र पार्टीले तोकेमा मात्र उमेदवार बन्न सक्नेछन् । पछिल्लो डिबेटमा बाइडेनपछि परे पनि ग्याभिनले भने उनको समर्थन गरेका थिए । उनको नाम मिडियामा बाइडेको विकल्पको रूपमा पहिलो नम्बरमा चर्चामा छ ।

सन् १९६७ को अक्टोबर १० मा जन्मेका ५६ वर्षिय ग्याभिन २०१९ देखि क्यालिफोर्नियाको ४० औं गभर्नरको रूपमा कार्यरत छन् । उनी यसअघि २०११ देखि २०१९ सम्म क्यालिफोर्नियाको ४९ औं लेफ्टिनेन्ट गभर्नर र त्योभन्दा अघि २००४ देखि २०११ सम्म सान फ्रान्सिस्कोका ४२ औं मेयर पनि भएका थिए । 

सान्ता क्लारा युनिभर्सिटीबाट सन् १९८९मा ग्राजुएसन गरेका उनले १९९१मा बुटिक वाइनरी प्लम्प ज्याक ग्रुप अर्का व्यक्ति गोर्डन ग्रेटीसँग मिलेर स्थापना गरेका थिए । 

उक्त कम्पनीले अन्य रेस्टुरेन्ट, होटेल समेत २३ बिजनेसको नेतृत्व गर्छ । उनी भने १९९६मा राजनीतिमा लागेका हुन् । सुरुमा उनलाई सान फ्रान्सिस्कोका मेयर विली ब्राउनले सहरको पार्किङ एण्ड ट्राफिक कमिसनमा नियुक्त गरेका थिए । सन् २००३ मा उनी सोही नगरको मेयरमा निर्वाचित भएका हुन् ।
 
उनका पिता विलियम अल्प्रेड न्युसम तृतीय स्टेट अपिल कोर्टका न्यायाधीश हुन् । ग्याभिन तीन वर्षको हुँदा उनकी आमा टेस्सा थोमससँग पिताको डिभोर्स भएको थियो । 

ग्याभिनले पनि सुरुमा डिस्टिक्ट एटर्नी किम्बर्ली गुइलफोइलसँग विवाह गरेकोमा दुई वर्षपछि डिभोर्स भएको थियो । अहिलेकी पत्नी जेनिफर साइबेलसँग उनले पछि विवाह गरे । उनीहरूका चार छोराछोरी छन् । उनी क्यालिफोर्नियामा होमलेस बढी भएको, ड्रग धेरै कारोबार भइरहेको र ट्याक्सको बृद्धिलाई लिएर केही आलोचना पनि हुने गरेको छ ।

उनको डोनाल्ड ट्रम्पसँग अनौठो लिंक छ । किनकी उनकी पहिलो पत्नी डोनाल्ड ट्रम्प जुनियरसँग हाल इन्गेज छन् । उनको पूर्वसभामुख तथा डेमोक्रेटिक नेता नान्सी पेलोसीसँग पनि टाढाको नाता पर्ने जनाइएको छ । 

उनी सानामा डिस्लेक्सिया अर्थात् लर्निङ डिस्अर्डर रोगबाट पीडित भए पनि पछि सुधार भएको थियो ।

(स्काइ न्यूज तथा अन्य एजेन्सी)