काठमाडौं । कोपा अमेरिका–२०२४ कोलम्बियाले पराग्वेविरुद्ध २–१ को जित निकालेको छ । मंगलबार अमेरिकाको एनआरजी रंगशालामा भएको खेलमा कोलम्बियालाई जित दिलाउन ड्यानियल मुनोज र जेफेरसन लेर्माले गोल गरे । 

पराग्वेका जुलियो एन्सिासोले गोल फर्काए पनि टिमलाई हारबाट जोगाउन भने सकेनन् । खेलको ३२औँ मिनेटमा मुनोजको गोलमा कोलम्बियाले अग्रता बनाएको थियो । ४२औँ मिनेटमा लेर्माले गोल गरेपछि कोलम्बियाले पहिलो हाफमा २–० को अग्रता बनाएको थियो । 

६९औँ मिनेटमा एन्सिसोले गोल फर्काए पनि पराग्वेको हार टार्न भने सकेनन् । जितसँगै समूह ‘डी’ मा पहिलो खेलबाट तीन अंक जोडेको कोलम्बिया तालिकाको शीर्ष स्थानमा छ । पहिलो खेलमै हार बेहोरेको पराग्वे तालिकाको पुछारमा छ । 

मंगलबार नै भएको यसै समूहको अर्को खेलमा पाँचपटकको विश्वकप विजेता ब्राजिलले कोस्टा रिकासँग गोलरहित बराबरी खेल्दै अंक बाँडेको छ । समूहमा एक अंक जोडेको ब्राजिल तालिकाको दोस्रो र कोस्टा रिका तेस्रो स्थानमा छन् ।