नयाँ दिल्ली । भारतको नयाँ दिल्लीका मुख्यमन्त्री अरविन्द केजरीवालले सर्वोच्च अदालतमा दिएको याचिकामाथि सोमबार सुनुवाइ गरिएको छ । तर, उनी रिहा हुन पाएनन् ।

दिल्ली हाइकोर्टले उनको जमानतमाथि रोक लगाउने आदेश गरेको थियो । त्यसपछि उनले सर्वोच्चमा याचिका दिएका हुन् । हाइकोर्टको पूर्ण फैसला मंगलबार आउने भएकाले त्यसको प्रतीक्षा गरिने सर्वोच्च प्रशासनले जनाएको छ ।

केजरीवालका वकिल ऋषिकेश कुमारले समाचार एजेन्सी एएनआईसँग सर्वोच्चले त्यसबारेमा बुधबार फैसला गर्ने बताएका छन् ।

सुरुमा राउज एभिन्यु कोर्टले केजरीवाललाई जमानत दिने फैसला गरेको थियो । प्रवर्तन निर्देशनालय (ईडी)ले त्यसविरुद्ध दिल्ली हाइकोर्टमा याचिका दायर गरेको थियो ।

त्यसपछि हाइकोर्टले जमानत तत्काल नदिएकाले केजरीवाल छुट्न पाएका थिएनन् । हाइकोर्टले राउज एभिन्यु अदालतको फैसला कार्यान्वयनमा रोक लगाएको थियो ।

हाइकोर्टको निर्णयविरुद्ध केजरीवाल सर्वोच्च गएका थिए । सर्वोच्चले पनि हाइकोर्टको फैसला पर्खने भएकाले उनी तत्काल छुट्न नपाउने भएका हुन् ।

उनलाई सराब घोटाला प्रकरणमा गएको मार्चमा प्रहरीले पक्राउ गरेको थियो । लोकसभा निर्वाचनका क्रममा सर्वोच्चले उनलाई जमानत दिएको थियो । उनी जुन २ पछि फेरि तिहाड जेलमा थुनामा छन् । बीबीसी हिन्दीबाट ।