नयाँ दिल्ली । भारतको दुईदिने भ्रमणको अन्तिम दिन बंगलादेशकी प्रधानमन्त्री शेख हसिनासँगको संयुक्त पत्रकार सम्मेलनमा शनिबार भारतीय प्रधानमन्त्री नरेन्द्र मोदीले नेपालको पनि नाम लिएका छन् ।

उनले बंगलादेश भारतको नेइबरहुड फस्ट, एक्ट इस्ट पोलिसी, भिजन सागर र इन्डो प्यासिफिक भिजनको संगममा रहेको जनाए । लिखित दोस्रो प्यारामा उनले भनेका छन्, “गएको एक वर्षमा हामीले आपसमा धेरै महत्त्वपूर्ण लोककल्याणका परियोजना पूरा गरेका छौँ । अखउरा र अग्रतालको बीचमा छैटौँ भारत–बंगलादेश क्रस बोर्डर रेल लिंक सुरु भएको छ । भारतको उत्तरपूर्वी राज्यको कार्गो फेसिलिटी खुल्ना–मंगला बन्दरगाहमा सुरु भएको छ । मंगला बन्दरगाह पहिलोपटक रेलबाट जोडिएको छ । एक हजार ३२० मेगावाटको मैत्री थर्मल पावर प्लान्टको दुवै युनिटमा विद्युत् जेनेरेटिङ सुरु भएको छ । भारतीय रुपैयाँमा दुवै देशमा व्यापार सुरु भएको छ । बंगलादेश र भारतबीच गंगा नदीमा सबैभन्दा लामो रिभर क्रुज सफलतापूर्वक सम्पन्न भएको छ । पहिलो भारत र बंगलादेश क्रस बोर्डर मैत्रीपूर्ण पाइपलाइन सम्पन्न भएको छ । भारतको ग्रीड हुँदै नेपालबाट बंगलादेशसम्म विद्युत् निर्यात ऊर्जा क्षेत्रमा उपक्षेत्रीय सहयोगको पहिलो उदाहरण बनेको छ । यसखालका ठूला पहल धेरै क्षेत्रमा एक वर्षभित्रैमा हुनुले हाम्रो सम्बन्धको स्केल र गति प्रतिविम्बित हुन्छ ।”

उनले बिम्स्टेकसहित अरू अन्तर्राष्ट्रिय फोरममा पनि आफ्नो सहयोग जारी राख्ने बताए । स्थिर, समृद्ध र प्रगतिशील बंगलादेशको भिजनलाई साकार पार्न भारतको प्रतिबद्धता मोदीले दोहोर्‍याए ।

हसिना जुन २१ र २२ गरी भारतको दुईदिने भ्रमणमा आएकी हुन् । भारत र बंगलादेशबीच उनको भ्रमणपछि आपसी सहयोगका विषय समेटी १४ बुँदे संयुक्त वक्तव्य जारी गरिएको छ ।

हालै भारतका प्रधानमन्त्रीको शपथग्रहणका क्रममा पनि हसिना दिल्ली आएकी थिइन् । केही साताकै अन्तरमा उनी फेरि दिल्ली आएकी हुन् । उनी आउँदो जुलाईमा चीन भ्रमणमा जाँदै छिन् । त्योभन्दा अघि दिल्ली आएकी हुन् ।

टिस्टासम्बन्धी एक परियोजनामा चीनको सहयोग लिने कि भारतको भन्ने बारेमा बंगलादेशलाई अप्ठ्यारो अवस्था सिर्जना भएको छ । चीनले यसअघि नै उक्त परियोजनामा चासो देखाएको थियो । पछिल्लो समय भारतले पनि चासो देखाएको छ । एजेन्सी