काठमाडौं । डिफेन्डिङ च्याम्पियन सुवास तामाङले सूर्य नेपाल गल्फ टुर २०२३–२४ को अन्तिम प्रतियोगिता सूर्य नेपाल प्रिमियर गल्फ च्याम्पियनसिपको उपाधि जितेका छन् । उनले भुवन नगरकोटी र निरज तामाङलाई दुई स्ट्रोकले हराउँदै उपाधि हात पारेका हुन् ।

शुक्रबार ४–अन्डर ६८ को कार्ड तयार गर्दै सुवासले समग्रमा १६–अन्डर २७२ को सानदार नतिजामा उपाधि आफ्नो नाममा लेखाए । प्रो बनेपछिको पहिलो उपाधि जितेका उनले नगद दुई लाख ७५ हजार प्राप्त गरे ।

समग्रमा १४–अन्डर २७४ को स्कोरमा निरज र भुवनले संयुक्त रूपमा दोस्रो स्थान बाँडे । निरजले ५–अन्डर ६७ र भुवनले ३–अन्डर ६९ को स्कोर दर्ज गरे । उनीहरूले जनही एक लाख ४८ हजार ५०० नगद पुरस्कार प्राप्त गरे । दिनेश प्रजापतिले १–अन्डर ७१ सहित समग्रमा १२–अन्डर २७६ को स्कोरमा चौथो भए । उनले एक लाख दुई हजार रुपैयाँ हात पारे ।

समग्रमा ६–अन्डर २८२ को नतिजामा तोरण विक्रम शाही पाँचौँ हुँदै ८८ हजार प्राप्त गरे । उनले आज इभन–पार ७२ मा खेल सकाए । २–अन्डर २८६ को स्कोरमा छैटौँ भएका सञ्जय लामाले अन्तिम दिनको खेल २–अन्डर ७० मा सकाए । उनले ८० हजार नगद पुरस्कार हात पारे ।

समग्रमा इभन–पार २८८ सहित टंकबहादुर कार्की र जयराम श्रेष्ठ सातौँ भए । टंकले ३–अन्डर ६९ र जयरामले ४–ओभर ७६ मा खेल सकाए । उनीहरूले जनही ७१ हजार ५०० नगद हात पारे । समग्रमा १–ओभर २८९ को स्कोरमा रवि खड्का नवौँ र ६–ओभर २९४ सहित रामे मगर दशौँ भए ।