काठमाडौ । सूर्य नेपाल गल्फ टुर २०२३–२४ को अन्तिम प्रतियोगिता सूर्य नेपाल प्रिमियर गल्फ च्याम्पियनसिप आजदेखि गोकर्ण गल्फ क्लबमा सुरू भएकाे छ । ७२ होलको चारदिने प्रतियोगिता शुक्रबारसम्म चल्नेछ । कुल १५ लाख ५० हजार नगद पुरस्कार राशी रहेको प्रतियोगिताको विजेताले दुई लाख ७५ हजार नगद पुरस्कार प्राप्त गर्नेछ । दोस्रो र तेस्रो हुनेले क्रमशः एक लाख ७५ हजार र एक लाख २२ हजार प्राप्त गर्नेछन् । 

यस्तै, चौथो र पाँचौँ हुनेलाई एक लाख दुई हजार र ८० हजार प्रदान गरिनेछ । कुल २१ गल्फरले नगद पुरस्कार प्राप्त गर्नेछन् । पुरस्कार राशीको आधारमा सिजनकै ठूलो प्रतियोगितामा ३७ प्रोफेसनल र ११ एमेच्योर गल्फरको सहभागिता रहने पीजीए नेपालका महासचिव दिपक आचार्यले जानकारी दिए । 

दुई दिनको खेलपश्चात कट लागु हुनेछ । ३६ होलको समाप्तिमा उत्कृष्ट २१ र टाइमा पर्ने प्रोफेसनल खेलाडीहरूले मात्र अन्तिम दुई दिनको खेलका लागि स्थान बनाउनेछन् । एमेच्योर गल्फरको हकमा पनि कट बनाउन उत्कृष्ट २१ भित्र पर्नु पर्नेछ ।

यो सिजनको अन्तिम प्रतियोगितापश्चात सिजन अवधिभर कुल पुरस्कार रकम प्राप्त गरेको आधारमा नम्बर एक गल्फरको होडमा अहिले भुवन नगरकोटी सबैभन्दा अगाडि रहेका छन् । उनी धरानका निरज तामाङ भन्दा एक लाख १८ हजार ८७५ रूपैयाँले अगाडि छन् । भुवनले यो सिजनको सात प्रतियोगिता सकिँदा पाँच लाख ६६ हजार ८७५ नगद पुरस्कार कमाएका छन् । उनले यो सिजन सूर्य नेपाल वेस्टर्न ओपन जितेका थिए ।

निरज तामाङ चार लाख ४८ हजारसहित मनि लिडर तालिकामा दोस्रो स्थानमा छन् । उनले यो सिजन सूर्य नेपाल काठमाडौं ओपनको उपाधि जितेका थिए । सूर्य नेपाल म्याच प्ले जितेका दिनेश प्रजापति तीन लाख ७२ हजारसहित तेस्रो स्थानमा छन् । सूर्य नेपाल च्यालेन्ज जितेका रवि खड्का तीन लाख ७२ हजारसहित चौथो र दुई लाख ६० हजार ७२५ नगदसहित सञ्जय लामा पाँचौँ स्थानमा  छन् । 

मनि लिडरहरूलाई डिफेन्डिङ च्याम्पियन सुवास तामाङले चुनौती प्रस्तुत गर्ने सम्भावना उच्च छ । एमेच्योर गल्फर रहँदा सुवासले कुल पाँच उपाधि जितेका छन् । यो सिजन प्रो बनेपछि उनको यो घरेलु टुरमा दोस्रो प्रतियोगिता हो । यो सिजन सातमध्ये दुई प्रतियोगिता सूर्य नेपाल सेन्ट्रल ओपन र सूर्य नेपाल एनपीजीए टुर च्याम्पियनसीप जितेका एमेच्योर गल्फर सदभाव आचार्य पनि प्रमुख दाबेदार हुन् । 

उनले यो सिजन सात प्रतियोगिताको समाप्तिमा कुनै पनि प्रोलेभन्दा बढी उपाधि जितेका छन् । सूर्य नेपाल प्रिमियर गल्फ च्याम्पियनसिपको प्रो–एम शनिबार हुनेछ । २५ प्रो र १०० एमेच्योर गल्फरको सहभागिता रहनेछ । 

पीजीए नेपालका अध्यक्ष रवीन्द्रमान श्रेष्ठले यो सिजनकै सर्वाधिक नगद पुरस्कार राशीको प्रतियोगितामा कडा प्रतिस्पर्धा हुने भन्दै जितको लागि शुभकामना दिए । उनले प्रमुख प्रायोजक सूर्य नेपाल प्रा.लि.लाई नेपाली गल्फ विकासमा निरन्तरको सहयोगका लागि धन्यवाद दिए ।