गुल्मी । नेपाल कम्युनिस्ट पार्टी (एमाले) गुल्मीको अध्यक्षमा बालसिंह काउछा निर्वाचित भएका छन् । अध्यक्षका प्रतिस्पर्धी हीरा एसीलाई पराजित गर्दै काउछा दोस्रो कार्यकालका निम्ति निर्वाचित भएका हुन् । उनले ३८४ र उनका प्रतिस्पर्धी एसीले २०२ मत प्राप्त गरे ।

यस्तै, जिल्ला उपाध्यक्षमा जीवन पोखरेल, सचिवमा धर्म विश्वकर्मा र सहसचिवमा चक्रबन्धु भुसाल निर्वाचित भएका छन् ।

गएको मंगलबारदेखि सुरु १२औँ जिल्ला अधिवेशनमा बिहीबार मतदान भएको थियो । अधिवेशनमा ६१३ जना सहभागी थिए । ५९५ जनाले मतदान गरेका थिए ।

पाँच पदाधिकारीसहित आउँदो तीन वर्षका निम्ति अधिवेशनबाट १०५ सदस्यीय जिल्ला कमिटी चयन गरिएको छ । पार्टीका केन्द्रीय उपमहासचिव प्रदीप ज्ञवालीले अधिवेशनको उद्घाटन गरेका थिए । रासस