काठमाडौं । नेकपा (एकीकृत समाजवादी) पार्टीको महाधिवेशनका लागि केन्द्रीय नेताहरू तलैबाटै प्रतिनिधि चुनिएर आउनुपर्ने निर्णयबाट पछि हटेको छ ।

बुधबार बसेको सचिवालय बैठकले केन्द्रीय कमिटी, केन्द्रीय निकायका नेता स्वतः प्रतिनिधि हुने निर्णय गरेको हो । पार्टीको केन्द्रीय सचिव समेत रहेका कार्यालयका सचिव जीवनराम श्रेष्ठका अनुसार आयोजक कमिटी स्वतः प्रतिनिधि हुने निर्णय भएको हो । तल्ला कमिटीबाट केन्द्रका नेता जाँदा आफूहरू छुट्ने गुनासो गरेकाले सो निर्णय गरिएको उनले बताए । 

“तलबाट निकै दबाब आयो । विद्रोहपछि हुन लागेको महाधिवेशनमा केन्द्रको नेताहरू प्रतिस्पर्धाका लागि आउने भएपछि हामी छुट्ने भयौँ भन्ने गुनासो आयो । केन्द्रीय नेताहरू चुनाव लड्न आउनु भएन भनेर दबाब आयो । त्यसले गर्दा केन्द्रीय सदस्य, केन्द्रीय निकाय  स्वतः प्रतिनिधि हुने भन्ने निर्णय भएको छ,” उनले भने । त्यसो गर्दा करिब ४०० जना स्वतः महाधिवेशन प्रतिनिधि हुने उनले जानकारी दिए । 

०८० माघमा भएको केन्द्रीय परिषद्को बैठकले प्रतिनिधि बन्न केन्द्रीय नेताहरू पनि सम्बन्धित क्षेत्रबाट चुनिनुपर्ने निर्णय गरेको थियो । 

पार्टीका अर्का एक पदाधिकारीका अनुसार केन्द्रीय नेता चुनिनुपर्ने व्यवस्था गर्दा उनीहरू प्रतिनिधि बन्न नपाउने सम्भावना बढेपछि सो व्यवस्था हटाइएको हो । यो निर्णयसँगै केन्द्रीय नेताहरू सुरक्षित भएका छन् । एकीकृत समाजवादीको केन्द्रीय महाधिवेशन आगामी असार १६–२० गतेसम्म काठमाडौंमा गर्ने निर्णय यसअघि नै भएको छ । 

प्रतिनिधि छनोट असार ६ गते 
बुधबारको सचिवालय बैठकले स्वतः बाहेकका प्रतिनिधि असार ६ गते चुन्ने निर्णय गरेको छ । सचिव श्रेष्ठका अनुसार देशैभर एकैदिन प्रतिनिधि छान्ने निर्णय भएको छ । एकीकृत समाजवादीको महाधिवेशनमा करिब दुई हजार प्रतिनिधि रहने जनाएको छ । १२५ पार्टी सदस्य बराबर एक प्रतिनिधि रहने निर्णय बैठकले गरेको छ । 

प्यानलगत प्रतिस्पर्धामा रोक 
सचिवालय बैठकले महाधिवेशन प्रतिनिधि छनोटका लागि आचारसंहिता पनि तयार गरेको छ । सचिव श्रेष्ठका अनुसार प्यानलगत प्रतिस्पर्धामा रोक लगाइएको छ । प्यालनगत रूपमा उठ्न, प्रचारप्रसार गर्न नपाउने निर्णय गरिएको छ । कुनै नेताको उमेदवार भनी भोट माग्न नपाउने व्यवस्था एकीकृत समाजवादीले आचारसंहितामा राखेको छ । 

नेकपा (एमाले)सँग विभाजन भएको करिब तीन वर्ष पुग्न लाग्दा महाधिवेशन गर्न लागेको हो । पाँच वर्षभित्र महाधिवेशन गर्नुपर्ने कानुनी व्यवस्था रहेको छ । महाधिवेशनमा अध्यक्षका लागि हालका अध्यक्ष माधवकुमार नेपाल, सम्मानित नेता झलनाथ खनाल, महासचिव घनश्याम भुसालले तयारी थालेका छन् ।