काठमाडौं । ललितपुर प्रहरीले चोरीमा संलग्न रहेको आरोपमा चार जनालाई पक्राउ गरेको छ । जिल्ला प्रहरी कार्यालय ललितपुरको टोलीले ललितपुर महानगरपालिका–१८ ढुंगेधारा मार्गस्थित सिर्जना वैद्यको घरमा चोरी गर्ने समूहलाई पक्राउ गरेको हो ।

वैद्यको घरमा यही जेठ २ गते दिउँसोकै समयमा घरमा कोही नभएका बेला चोरी भएको थियो । उनको घरबाट सुन, चाँदीका गरगहना तथा नगदसहित धनमाल चोरी भएको उजुरीका आधारमा उनीहरूलाई पक्राउ गरिएको ललितपुरका एसपी नरेश सुवेदीले जानकारी दिए ।

पक्राउ पर्नेमा भोजपुरका ३० वर्षीय सीताराम लकान्द्रे, रामेछापका ३७ वर्षीय सुजनकुमार सुनुवार, नुवाकोटका ४० वर्षीय कुमार राना मगर र दोलखाको सैलुङका ४१ वर्षीय वीरबहादुर श्रेष्ठ रहेका छन् ।

पक्राउ परेकामध्ये सीताराम सुन व्यवसायी हुन् । उनीहरूलाई फरकफरक मितिमा ललितपुरको विभिन्न ठाउँबाट पक्राउ गरिएको हो ।

चोरीमा संलग्न सुनिल श्रेष्ठ केही दिनअघि नै पक्राउ परेर पुर्पक्षका लागि थुनामा पुगेको खुलेको छ ।

उनीहरूको साथबाट प्रहरीले ६ तोला बराबरको सुनका गरगहना तथा नगद बरामद गरेको छ ।

पक्राउ परेकामाथि अनुसन्धान गर्दै जाँदा पक्राउ वीरबहादुर श्रेष्ठ यसअघि चोरीकै आरोपमा २० पटक पक्राउ परेको खुलेको छ । यो उनको २१ पटक हो । उनी चोरीको आरोपमा पटकपटक पक्राउ पर्दै अदालतबाट धरौटीमा छुट्ने र फेरि पुरानै पेसामा फर्किने गरेको खुलेको हो ।