काठमाडौं । आईसीसी ट्वान्टी–२० विश्वकपमा दक्षिण अफ्रिकाले बंगलादेशसामू ११४ रनको लक्ष्य प्रस्तुत गरेको छ ।

सोमबार न्यूयोर्कमा जारी खेलमा टस जितेर ब्याटिङमा आएको दक्षिण अफ्रिकाले निर्धारित २० ओभरमा ६ विकेट गुमाएर ११३ रनको योगफल खडा गरेको हो ।

दक्षिण अफ्रिकाका हेनरिक क्लासेनले सर्वाधिक ४६ रन बनाए । अर्धशतक बनाउन चार रनले चुकेका क्लासेनले दुई चौका र तीन छक्का प्रहार गरे ।

डेविड मिलरले २९ र क्विन्टन डि ककले १८ रन बनाए । यसबाहेक, अन्यले दोहोरो अंकमा रन जोड्न सकेनन् । 

बंगलादेशका तान्जिन हसन साकिबले तीन विकेट लिए । ताक्षिक अहमेदले दुई र रिसाद हुसैनले एक विकेट लिए ।

प्रतियोगितामा दक्षिण अफ्रिकाको यो तेस्रो खेल हो । समूह ‘डी’मा लगातार दुई जित निकालेको दक्षिण अफ्रिका तालिकाको शीर्ष स्थानमा छ ।

तालिकाको दोस्रो स्थानमा रहेको बंगलादेशको भने यो दोस्रो खेल हो । बंगलादेशको खातामा दुई अंक छ । यस समूहमा यी दुई टिमसँगै नेदरल्यान्ड्स, श्रीलंका र नेपाल पनि छन् ।