काठमाडौं । फ्रेन्चाइज क्रिकेट प्रतियोगिता नेपाल प्रिमियर लिग (एनपीएल)का दौरान आयोजक नेपाल क्रिकेट संघ (क्यान)ले 'कानुन उल्लघंन' गरेको विषयमा छानबिन गर्न राष्ट्रिय खेलकुद परिषद् (राखेप)ले समिति गठन गरेको छ ।

राखेपले बोर्ड सदस्य अञ्जन धमलाको संयोजकत्वमा गठन गरेको समितिमा सारंगी निरौला र कमल दाहाल सदस्य छन् ।

राष्ट्रिय खेलकुद परिषद् (राखेप)का सूचना अधिकारी खुशराज दाहालका अनुसार, एनपीएलका दौरान खेलकुद विकास ऐनसँगै नेपालका अन्य प्रचलित कानुन उल्लघंन भएको देखिएकाले समिति गठन गरिएको हो ।

युवा तथा खेलकुद मन्त्रालयको निर्देशनमा छानबिन समिति गठन गरिएको दाहाल बताउँछन् ।

“खेलकुद मन्त्रालयले नेपाल क्रिकेट संघको आयोजनामा भएको नेपाल प्रिमियर लिगबारे विभिन्न सन्दर्भमा उठेका प्रश्नहरूबारे छानबिन गर्न निर्देशन दिएको हुँदा समिति बनेको छ । समितिले अबको १५ दिनभित्र प्रतिवेदन बुझाउनपर्नेछ,” दाहालले बाह्रखरीसँग भने ।