काठमाडौं । मालपोत कार्यालयका तत्कालीन मालपोत अधिकृत हरिनारायण मिश्रसहित ६ जना भ्रष्टाचार मुद्दामा दोषी ठहर भएका छन् ।

विशेष अदालतका न्यायाधीशहरू अध्यक्ष टेकनारायण कुँवर र सदस्यहरू तेजनारायणसिंह राई र रामबहादुर थापाको इजलासले तत्कालीन मालपोत अधिकृत मिश्रसहित भुपबहादुर बोगटी, गोपालबहादुर ढुंगाना, पदमप्रसाद अर्याल र चन्द्रबहादुर भण्डारी गरी पाँचजना अधिकृतलाई दोषी ठहर गरेको हो । उनीहरूसँगै कम्युटर अपरेटर कमोद तिवारी पनि दोषी ठहर भएका छन् ।

उनीहरूलाई सजाय निर्धारणका लागि आगामी असार ५ गतेको पेसी तोकिएको छ ।

सजाय पाएका सात जनामध्ये तत्कालीन नायव सुब्बा किरण उपाध्यायको मृत्यु भइसकेको छ । मृत्यु भइसकेका उपाध्यायबाट अदालतले एक करोड २५ लाख ११ हजार ९९० रुपैयाँ राजस्व हिनामिना भएको भन्दै उनको नामको बिगो अंश लिएका छोराहरू राजकिशोर उपाध्याय, गौतम उपाध्याय, पशुपति उपाध्याय र मुरारी उपाध्यायबाट असुल गर्न फैसला गरेको छ ।

उनीहरूले मिलेमतोमा आर्थिक वर्ष ०७१/७२ को जग्गा रजिस्ट्रेसनबापत प्राप्त राजस्व दाखिला नगरी बाँडफाँट गरेको भन्दै अख्तियार दुरुपयोग अनुसन्धान आयोगले ०८० कार्तिक २० गते‍ मुद्दा दायर गरेको थियो ।