काठमाडौं । नेकपा (माओवादी केन्द्र)का राष्ट्रियसभा सदस्य मायाप्रसाद शर्माले सरकारले ल्याएको आगामी आर्थिक वर्षको बजेट सापेक्ष, वस्तुवादी र यथार्थपरक रहेको बताएका छन् । सोमबार राष्ट्रियसभा बैठकमा उनले विगतमा बजेटका सिद्धान्त र प्राथिमकतामाथि छलफल नै नगरी बजेट ल्याइने भए पनि यस वर्ष पर्याप्त छलफलपछि आएको बताए । 

उनले नीति तथा कार्यक्रम, बजेट वक्तव्य सबैमा हेर्दा यो बजेटमा लय मिलेको दाबी गरे ।  सीमा र समस्याहरू पनि बजेटमा उजागर गरिएको बताउँदै सांसद शर्माले बजेटमा स्पष्ट रूपमा पाँच उद्देश्य, पाँच प्राथमिकता, आर्थिक सुधारका पाँच रणनीति उल्लेख गरिएको बताए । 

“यस पटकको बजेट अलि नयाँ ढंगले आएको छ । हामी यसलाई छलफल पुगेन, बहस पुगेन भन्ने गर्थ्यौँ । तर, यो पटक पर्याप्त छलफलपछि आएको छ । त्यसैले यो बजेट सापेक्ष, वस्तुवादी र यथार्थपरक छ । नीति तथा कार्यक्रम, बजेट वक्तव्य सबैमा हेर्दा यो बजेटमा लय मिलेको छ । सीमा र समस्याहरू पनि बजेटमा उजागर भएका छन्,” उनले भने, “बजेटमा स्पष्ट रूपमा पाँच उद्देश्य, पाँच प्राथमिकता, आर्थिक सुधारका पाँच रणनीति उल्लेख छन् ।”

उनले संघीयताको लाभ गरिब, विपन्न र विभेदमा परेका वर्ग, समुदायहरूले लिनसक्ने गरी बजेट ल्याइएको दाबी गरे ।