काठमाडौं । युक्रेनले गरेको आक्रमणमा क्राइमियाको बेलबेक एयरबेसमा रुसका तीन जेट क्षतिग्रस्त हुनुका साथै भवन समेत भत्किएको पाइएको छ । त्यसबारे युक्रेनका तर्फबाट केही नबताइए पनि त्यहाँ क्षति भएको सेटलाइटमार्फत प्राप्त तस्बिर सीएनएनले सार्वजनिक गरेको हो ।

युक्रेनले क्राइमियाको सोभास्टोपोलमा आक्रमण गर्दा उक्त अवस्था निम्तिएको जनाइएको छ । क्राइमियालाई रुसले सन् २०१४ मा आफ्नो देशमा गाभेको थियो ।

उक्त तस्बिर अमेरिकी सेटलाइट इमेजिङ कम्पनी ब्ल्याकस्काइ र स्पेस टेक्नोलोजी म्याक्सरले लिएका हुन् । तस्बिरमा दुई जेट मुख्य उडान लाइनभन्दा बाहिर र एउटा पार्क गरेको स्थानमा क्षति भएको देखिन्छ । भवनमा पनि क्षति भएको देखिएको छ ।

उता, रुसबाट नियुक्त सेभास्तोपोलका गभर्नर मिखाइल राजभोजाएभले  त्यहाँ व्यापक रूपमा गरिएको आक्रमणका शत्रुलाई भगाइएको जनाएका छन् । उनले दर्जनौँ मानवरहित एरियल भेइकल र पाँचभन्दा बढी समुद्री ड्रोनलाई ध्वस्त पारिएको दाबी गरेका छन् । उनले ड्रोनको ‘फोहोर’ एउटा पावर सबस्टेसनमा खस्दा विद्युत् अवरुद्ध भएको समेत जनाएका छन् । सीएनएनबाट ।